“21 ஆண்டுகால ஏக்கம்.. டெல்லிக்கு பறக்கும் தேமுதிக..! 2026 தேர்தலுக்கு முன்பே அடித்த ‘ஜாக்பாட்’ இதுதான்”..!

தேசிய முற்போக்கு திராவிட கழகம் (தேமுதிக) தொடங்கப்பட்டு 21 ஆண்டுகள் கடந்துள்ள நிலையில், அக்கட்சியின் வரலாற்றில் முதல்முறையாக நாடாளுமன்றத்திற்குள் நுழையும் வாய்ப்பு தற்போது கனிந்துள்ளது. 2005-ல் கேப்டன் விஜயகாந்த் கட்சி தொடங்கிய 6 ஆண்டுகளிலேயே தமிழக சட்டசபையில் எதிர்க்கட்சித் தலைவர் அந்தஸ்தைப் பெற்று சாதனை படைத்தார். இருப்பினும், டெல்லி நாடாளுமன்ற அதிகார மையத்தில் ஒரு தேமுதிக உறுப்பினரைக் கூட இதுவரை அக்கட்சியால் அமர வைக்க முடியவில்லை என்பது நீண்டகால குறையாக இருந்து வந்தது.

கடந்த காலங்களில் மாநிலங்களவை (ராஜ்யசபா) மற்றும் மக்களவைத் தேர்தல்களில் தேமுதிக தொடர்ந்து முயற்சி செய்தாலும், வெற்றி என்பது எட்டாக்கனியாகவே இருந்தது. குறிப்பாக, 2013-ம் ஆண்டு ராஜ்யசபா தேர்தலில் போதிய பலம் இருந்தும், உட்கட்சி குழப்பங்களால் அக்கட்சியின் வேட்பாளர் ஏ.ஆர். இளங்கோவன் தோல்வியடைந்தார். கடந்த 2024 மக்களவைத் தேர்தலில் விருதுநகர் தொகுதியில் போட்டியிட்ட விஜய பிரபாகரன், மிகக் குறைந்த வாக்கு வித்தியாசத்தில் வெற்றியைத் தவறவிட்டது தொண்டர்களிடையே பெரும் ஏமாற்றத்தை ஏற்படுத்தியது.

இந்நிலையில், வரவிருக்கும் தேர்தலை முன்னிட்டு தேமுதிக தற்போது திமுக கூட்டணியில் இணைந்துள்ளது. இந்தத் தொகுதிப் பங்கீட்டு ஒப்பந்தத்தில் தேமுதிகவுக்கு ஒரு ராஜ்யசபா சீட் ஒதுக்குவது அதிகாரப்பூர்வமாக உறுதி செய்யப்பட்டுள்ளது. அதிமுக கூட்டணியில் எதிர்பார்த்த மாநிலங்களவை உறுப்பினர் பதவி கிடைக்காத விரக்தியில் இருந்த தேமுதிகவுக்கு, திமுகவின் இந்த அறிவிப்பு ஒரு பெரும் அரசியல் வெற்றியாகப் பார்க்கப்படுகிறது. இதன் மூலம் இரண்டு தசாப்த கால ஏக்கம் முடிவுக்கு வந்துள்ளது.

இந்த வரலாற்றுச் சிறப்புமிக்க முதல் நாடாளுமன்ற வாய்ப்பை தேமுதிகவின் பொருளாளரும், பிரேமலதா விஜயகாந்தின் சகோதரருமான எல்.கே. சுதீஷ் பெறப்போவதாகத் தகவல்கள் தெரிவிக்கின்றன. இதற்கான அதிகாரப்பூர்வ அறிவிப்பு இன்று வெளியாக உள்ளது. டெல்லி நாடாளுமன்றத்திற்குள் தேமுதிக முதன்முதலில் கால் பதிக்கப் போவது, விஜயகாந்த் மறைவுக்குப் பிறகு சோர்ந்து போயிருந்த அக்கட்சித் தொண்டர்களுக்குப் புதிய உற்சாகத்தையும், அரசியல் அங்கீகாரத்தையும் கொடுத்துள்ளது.