பூங்காவில் கேட்ட அலறல் சத்தம்… 17 வயது சிறுமி கூட்டு பலாத்காரம்…. டெல்லியில் மீண்டும் உச்சக்கட்ட பரபரப்பு….!

இந்தியத் தலைநகர் புதுடெல்லியில் பெண்களுக்கும் சிறுமிகளுக்கும் எதிரான குற்றங்கள் தொடர்ந்து அதிகரித்து வரும் சூழலில், பூங்காவில் இருந்த 17 வயது சிறுமிக்கு 3 பேர் கொண்ட கும்பல் பாலியல் வன்கொடுமை இழைத்த சம்பவம் பெரும் பரபரப்பை ஏற்படுத்தியுள்ளது. டெல்லியின் கல்காஜி மந்திர் அருகே உள்ள பூங்காவில் அச்சிறுமி தன் நண்பருடன் பேசிக்கொண்டிருந்தபோது, அங்கு வந்த 3 நபர்கள் தங்களைக் காவல் துறையினர் எனக் கூறி மிரட்டியுள்ளனர். தொடர்ந்து அச்சிறுமியை அவர்கள் கூட்டுப் பாலியல் வன்கொடுமை செய்துள்ளனர். இச்சம்பவம் தொடர்பாக வழக்குப் பதிவு செய்த போலீசார், குற்றவாளிகளைப் பிடிக்கத் தனிப்படைகளை அமைத்து தீவிர விசாரணை நடத்தினர். இதில் தொடர்புடைய ஆசிப் என்பவரைக் காவல் துறையினர் சுற்றி வளைத்தபோது, அவர் தாக்க முற்பட்டதால் அவரை போலீசார் சுட்டுப் பிடித்தனர். தலைமறைவாக உள்ள மற்ற இருவரைப் போலீசார் தீவிரமாகத் தேடி வருகின்றனர்.

தலைநகரில் கடந்த 10 நாட்களில் சிறுமிகளுக்கு எதிராக நடக்கும் 4-வது பாலியல் கொடூரம் இது என்பது குறிப்பிடத்தக்கது. கடந்த செப்டம்பர் 13 அன்று ஸ்வரூப் நகரில் 17 வயது சிறுமி கூட்டுப் பாலியல் வன்கொடுமை செய்யப்பட்டுப் படுகொலை செய்யப்பட்டார்; செப்டம்பர் 16 அன்று சதர் பஜார் பகுதியில் 10 வயது மாணவி கைகால்கள் கட்டப்பட்டுப் பாலியல் கொடுமைக்கு ஆளாக்கப்பட்டார்; மேலும் செப்டம்பர் 21 அன்று கிஷன் கஞ்ச் பகுதியில் 6 வயது சிறுமி ஒருவர் பாலியல் வன்கொடுமை செய்யப்பட்டார். இவ்வாறு அடுத்தடுத்து நடைபெறும் கொடூரச் சம்பவங்கள் டெல்லி நகரின் பாதுகாப்பைக் கேள்விக்குறியாக்கியுள்ளதோடு, மக்கள் மத்தியிலும் கடுமையான அதிர்ச்சியையும் அச்சத்தையும் ஏற்படுத்தியுள்ளன.