“49 சீட் பாஜகவுக்கு.. 23 பாமகவுக்கு.. 131-ல் அதிமுக போட்டி”… அமித்ஷா வகுத்த ‘வின்னிங்’ ஃபார்முலா…. கசிந்த ரகசிய பட்டியல்….!

2026 தமிழக சட்டமன்றத் தேர்தலை முன்னிட்டு அதிமுக – பாஜக கூட்டணி குறித்த வியூகங்கள் தற்போதே அரசியல் களத்தில் அனலை கிளப்பத் தொடங்கியுள்ளன. குறிப்பாக, மத்திய உள்துறை அமைச்சர் அமித் ஷா தலைமையிலான பாஜக மேலிடம், அதிமுகவின் பல்வேறு பிரிவுகளை ஒன்றிணைத்து ஒரு வலுவான கூட்டணியை உருவாக்கத் திட்டமிட்டுள்ளது. சிதறிக் கிடக்கும் வாக்குகளை ஒருங்கிணைப்பதன் மூலம் ஆளுங்கட்சிக்குக் கடுமையான சவாலை ஏற்படுத்த டெல்லி தலைமை இந்த மெகா திட்டத்தைத் தீட்டியுள்ளதாகத் தெரிகிறது.

இந்த உத்தேச தொகுதிப் பங்கீட்டின்படி, மொத்தமுள்ள 234 தொகுதிகளில் அதிமுக 131 இடங்களில் நேரடியாகப் போட்டியிட முடிவு செய்துள்ளதாகக் கூறப்படுகிறது. பாஜகவுக்கு சுமார் 80 தொகுதிகள் வரை ஒதுக்கப்பட வாய்ப்புள்ள நிலையில், அதில் பாஜக நேரடியாக 49 இடங்களிலும், மீதமுள்ள இடங்களை அதன் கூட்டணிக் கட்சிகள் மற்றும் ஆதரவு அமைப்புகளுக்கும் பிரித்து வழங்கத் திட்டமிடப்பட்டுள்ளது. மற்ற முக்கிய கூட்டணிக் கட்சியான பாமகவுக்கு அதிமுகவின் பங்கிலிருந்து 23 தொகுதிகள் வரை ஒதுக்கப்படலாம் எனத் தகவல்கள் கசிகின்றன.

கூட்டணியை மேலும் வலுப்படுத்த, சிறிய கட்சிகள் மற்றும் தலைவர்களைச் சமாதானப்படுத்த மாநிலங்களவை  இடங்கள் ஒரு துருப்புச் சீட்டாகப் பயன்படுத்தப்பட உள்ளன. அதன்படி, அன்புமணி ராமதாஸுக்கு அதிமுக தரப்பிலிருந்தும், டிடிவி தினகரனுக்கு வட மாநிலம் ஒன்றின் வழியாக பாஜக தரப்பிலிருந்தும் மாநிலங்களவை இடங்களை உறுதி செய்து, தேர்தல் களத்தில் அவர்களின் முழு ஒத்துழைப்பைப் பெறத் திட்டமிடப்பட்டுள்ளது. இதன் மூலம் உட்கட்சிப் பூசல்களையும், குழப்பங்களையும் தவிர்த்து வெற்றியைக் குறிவைத்துச் செயல்பட பாஜக விரும்புகிறது.

கூட்டணியில் உள்ள மற்ற தலைவர்களான ஓ. பன்னீர்செல்வம் தரப்புக்கு 6 இடங்களும், டிடிவி தினகரனின் அமமுகவுக்கு 10 முதல் 12 இடங்களும் ஒதுக்கப்படலாம் என எதிர்பார்க்கப்படுகிறது. மேலும் ஜி.கே. வாசன், டாக்டர் கிருஷ்ணசாமி, பாரிவேந்தர் மற்றும் ஏ.சி. சண்முகம் போன்ற தோழமைக் கட்சித் தலைவர்களுக்கும் உரிய இடங்கள் பிரித்து வழங்கப்பட உள்ளன. இந்த வியூகம் முழுமையடைந்து தேர்தலைச் சந்திக்கும் பட்சத்தில், தமிழக அரசியல் வரலாற்றில் இது ஒரு மிக முக்கியமான அதிகாரப் போட்டியாக அமையும் என்பதில் ஐயமில்லை.