“அம்மா அம்மா”…. அதிகாலையில் கேட்ட கதறல் சத்தம்…. 600 போன் கால்கள்… 12 பேரிடம் ரகசிய விசாரணை…. செஞ்சி சிறுமி வழக்கில் திடுக்கிடும் திருப்பம்….!

விழுப்புரம் மாவட்டம் செஞ்சி அருகே உள்ள ஆலம்பூண்டி குளக்கரை தெருவைச் சேர்ந்த வடிவேலு – பவானி தம்பதியின் 7 வயது மகள் ஹேமாவதி, கடந்த அக்டோபர் 11-ஆம் தேதி இரவு தனது பிறந்தநாள் கொண்டாட்டத்திற்குப் பிறகு மாயமானார். வீட்டின் வாசற்கதவு திறந்திருந்த நிலையில் சிறுமி காணாமல் போய் 12 நாட்களைக் கடந்துள்ள நிலையில், வழக்கின் தீவிரத்தைக் கருத்தில் கொண்டு விசாரணையைத் தீவிரப்படுத்தியுள்ள சிபிசிஐடி அதிகாரிகள் தங்களது பிடியை இறுக்கி வருகின்றனர். தற்போது சிபிசிஐடி விசாரணையில் அடுத்தடுத்து கிடைத்துள்ள அதிர்ச்சித் தகவல்களும் சாட்சியங்களும் ஒட்டுமொத்தப் பகுதியையும் பெரும் பதற்றத்தில் ஆழ்த்தியுள்ளன.

இந்த வழக்கில் எதிர்வீட்டுப் பெண் மஞ்சுளா அளித்த வாக்குமூலம் மிக முக்கியமான திருப்பத்தை ஏற்படுத்தியுள்ளது. சிறுமி மாயமான அன்று அதிகாலை நேரத்தில், வீட்டின் வெளியே ஒரு குழந்தையின் தீனமான குரலில் “அம்மா.. அம்மா..” என்று இருமுறை கதறி அழுத சத்தம் கேட்டதாகவும், உடனே கதவைத் திறந்து பார்த்தபோது அங்கு யாருமில்லை என்றும் அவர் தெரிவித்துள்ளார். நள்ளிரவில் குழந்தை தூக்கிச் செல்லப்படவில்லை; மாறாக அதிகாலை விடியும் நேரத்தில்தான் யாரோ குழந்தையைக் கவர்ந்து சென்றிருக்கலாம் அல்லது வாயைப் பொத்தித் தூக்கிச் சென்றிருக்கலாம் என்ற வலுவான சந்தேகத்தை இந்த வாக்குமூலம் ஏற்படுத்தியுள்ளது.

மறுபுறம், ஆலம்பூண்டி மற்றும் அதன் எல்லைப் பகுதிகளில் பொருத்தப்பட்டிருந்த கண்காணிப்பு கேமரா (CCTV) காட்சிகளை ஆய்வு செய்ததில், சிறுமி தானாக நடந்து ஊரின் எல்லையைக் கடந்ததற்கான எந்தப் பதிவும் இல்லை என்பது உறுதியாகியுள்ளது. இதன் மூலம் குழந்தை எங்கும் தொலைந்து போகவில்லை என்பதும், யாரோ திட்டமிட்டு ஆள் நடமாட்டம் இல்லாத மாற்றுப் பாதைகள் மூலமாகவோ அல்லது வாகனத்திலோ தூக்கிச் சென்றிருக்கலாம் அல்லது கிராமத்திற்குள்ளேயே மறைத்து வைத்திருக்கலாமோ என்ற அதிர்ச்சி கோணத்திலும் விசாரணை நகர்கிறது. மேலும், செல்போன் கோபுரங்களில் பதிவான 600-க்கும் மேற்பட்ட அழைப்புகளை ஆய்வு செய்து, சந்தேகத்தின் பேரில் உள்ளூர்வாசிகள் மற்றும் பழைய குற்றவாளிகள் உட்பட 12-க்கும் மேற்பட்டோரிடம் ரகசிய இடத்தில் விசாரணை நடத்தப்பட்டு வருகிறது.

இதனிடையே, சிறுமிக்கு ஏதேனும் விபரீதம் நேர்ந்திருக்கலாமோ என்ற அச்சத்தில், செஞ்சி தீயணைப்பு மற்றும் மீட்புப் பணிகள் துறையினர் தரைவழித் தேடுதல் வேட்டையை முடுக்கிவிட்டுள்ளனர். ஆலம்பூண்டியை ஒட்டியுள்ள நடுப்பட்டு, ஆர்க்காம்பூண்டி உள்ளிட்ட சுற்றுவட்டாரக் கிராமங்களில் உள்ள பாழடைந்த விவசாயக் கிணறுகள், ஆழ்துளைக் கிணறுகள் மற்றும் புதர்களுக்குள் வீரர்கள் கயிறுகட்டி இறங்கிச் சல்லடை போட்டுத் தேடி வருகின்றனர். அதிகாலையில் கேட்ட அந்த அழுகுரலின் பின்னணியைக் கண்டறிந்து, மாயமான சிறுமி ஹேமாவதியை உயிருடன் மீட்க சிபிசிஐடி தனிப்படையினர் இரவும் பகலும் தீவிரமாகப் போராடி வருகின்றனர்.