ஆட்சி மாற்றத்தால் வந்த சோதனை….. சென்னைக்கு வரவிருந்த 1000 ஏசி மின்சார பேருந்துகள் டெண்டர் ரத்து…. இரவோடு இரவாக வெளியான அதிர்ச்சி தகவல்…!

சென்னையில் பொதுப்போக்குவரத்தை மேம்படுத்தும் நோக்கில் மாநகர போக்குவரத்து கழகத்தின் சார்பில் வெளியிடப்பட்ட 1000 ஏசி மின்சார பேருந்துகள் கொள்முதலுக்கான டெண்டர் ரத்து செய்யப்பட்டுள்ளது. தனியார் பங்களிப்புடன் மொத்த செலவு ஒப்பந்த அடிப்படையில் இயக்கப்படவிருந்த இந்த பேருந்துகளுக்கான டெண்டர், கடந்த மார்ச் மாதம் வெளியிடப்பட்டது. இருப்பினும், அரசியல் மற்றும் ஆட்சி மாற்றச் சூழல்கள் காரணமாக இதன் திறப்பு தேதி பலமுறை ஒத்திவைக்கப்பட்ட நிலையில், தற்போது நிர்வாகக் காரணங்களைக் குறிப்பிட்டு டெண்டர் அதிகாரப்பூர்வமாக ரத்து செய்யப்பட்டுள்ளது.

இதேபோல், சென்னை மெட்ரோ ரயில் நிலையங்களை இணைக்கும் வகையில் 220 சிறிய வகை ஏசி மின்சார பேருந்துகளை இயக்கவும் திட்டமிடப்பட்டு டெண்டர் கோரப்பட்டிருந்தது. இதில் 7 மீட்டர் மற்றும் 5 மீட்டர் நீளமுள்ள மின்சார பேருந்துகள் இயக்கப்படவிருந்த நிலையில், எந்தவொரு நிறுவனமும் இதில் பங்கேற்று விண்ணப்பிக்கவில்லை. இதன் காரணமாக, மெட்ரோ இணைப்புப் போக்குவரத்துச் சேவையைச் செயல்படுத்துவதிலும் தற்காலிகமாகப் பின்னடைவு ஏற்பட்டுள்ளது.

இந்த டெண்டர் முறையான நிர்வாக ஒப்புதலைப் பெறாமலேயே கடந்த ஆண்டில் வெளியிடப்பட்டதே இதன் ரத்துக்கான முக்கியக் காரணமாகக் கூறப்படுகிறது. எனினும், தமிழக பட்ஜெட்டில் இதற்குத் தேவையான நிதி ஏற்கனவே ஒதுக்கப்பட்டுள்ளதால், பொதுமக்கள் மத்தியில் நிலவும் கவலைகள் தேவையற்றவை என அதிகாரிகள் தெளிவுபடுத்தியுள்ளனர்.

விரைவில் உரிய நிர்வாக அனுமதிகள் பெறப்பட்டு, அரசாணை வெளியிடப்பட்டவுடன் புதிய ஏசி மின்சார பேருந்துகள் வாங்குவதற்கான நடவடிக்கைகள் மீண்டும் தொடங்கப்படும் என்று போக்குவரத்துத் துறை அதிகாரிகள் உறுதியளித்துள்ளனர். இதன் மூலம் சென்னை நகரில் அதிகரித்து வரும் பயணிகள் போக்குவரத்துத் தேவையும், மெட்ரோ நிலையங்களுக்கான இணைப்புப் போக்குவரத்து வசதியும் விரைவில் முழுமையாக நிவர்த்தி செய்யப்படும் என எதிர்பார்க்கப்படுகிறது.