இனி பிரேத பரிசோதனை அறிக்கையை எளிதாக பெறலாம்… தமிழக அரசு கொண்டுவரும் புதிய வசதி..!!

தமிழகத்தில் தற்கொலை, சாலை விபத்து, சந்தேக மரணத்தில் உயிரிழப்பவர்களின் சடலங்கள் பிரேத பரிசோதனை செய்யப்படுகிறது. இந்த பிரேத பரிசோதனை அறிக்கையின் அடிப்படையில் தான் போலீசார் விசாரணை மேற்கொண்டு வருகிறார்கள். மேலும் ஆஸ்பத்திரியிலிருந்து கோர்ட்டுக்கும் பிரேத பரிசோதனை அறிக்கை  மூடிய நிலையில்  சீல் வைத்து அனுப்பப்படுகிறது. காவல்துறையினர் வந்து நேராக அறிக்கை பெற்றுக் கொள்வார்கள். இந்த பிரேத பரிசோதனை அறிக்கை காவல்துறைக்கும் கோர்ட்டுக்கும் அனுப்புதில் பல நடைமுறை சிக்கல்கள் உள்ளது.

இந்த சிக்கல்களை தற்போது எளிதாக்கும் பொருட்டு தமிழக அரசு புதிய வசதியை கொண்டு வரவுள்ளது. அதன்படி அரசு மருத்துவமனையில் பிரேத பரிசோதனை அறிக்கைகள் ஆன்லைனில் பதிவேற்றம் செய்யப்படும் பணிகள் மேற்கொள்ளப்பட்டு வருகிறது. இந்த அறிக்கைகளை கோர்ட் மற்றும் போலீசார் மட்டும் பதிவிறக்கம் செய்ய அனுமதி வழங்கப்பட உள்ளது .இதன் மூலமாக தாமதம், ஊழல், சட்டவிரோத செயல்கள் என அனைத்துமே தவிர்க்கப்படும் என அதிகாரிகள் தெரிவித்துள்ளனர்.