நண்பரே செய்த சதியா?… கனவுகளோடு சென்ற பெண்கள்… அமெரிக்காவில் அடுத்தடுத்து பலியான இளம்பெண்கள்… வெளியான பகீர் தகவல்…!!

அமெரிக்காவின் கலிபோர்னியா மாநிலத்தில் ஒரே அடுக்குமாடி குடியிருப்பில் வசித்து வந்த கேரளாவைச் சேர்ந்த அஞ்சனா ஹரி மற்றும் ஆன் மேத்யூ ஆகிய இரு பெண்கள் கொடூரமாக கொலை செய்யப்பட்டுள்ளனர். திருச்சூர் மற்றும் திருவனந்தபுரத்தைச் சேர்ந்த இவர்கள் இருவரும் அங்கு வெவ்வேறு துறைகளில் பணியாற்றி வந்தாலும், ஒருவருக்கொருவர் நன்கு அறிமுகமானவர்களாக இருந்துள்ளனர். இவர்களது இந்த திடீர் மரணம் அமெரிக்க வாழ் மலையாளிகள் மத்தியிலும், கேரளாவில் உள்ள அவர்களது குடும்பத்தினர் இடையேயும் பெரும் அதிர்ச்சியையும் சோகத்தையும் ஏற்படுத்தியுள்ளது.

இந்த இரட்டை கொலை வழக்கில், ஆன் மேத்யூ கத்தியால் குத்தப்பட்டும், அஞ்சனா வீட்டை விட்டு வெளியே அழைக்கப்பட்ட நிலையில் ஒரு காரால் மோதப்பட்டும் கொல்லப்பட்டதாக முதற்கட்ட தகவல்கள் தெரிவிக்கின்றன. நீல நிற எஸ்.யு.வி கார் மூலமாக அஞ்சனா மீது மோதிய 32 வயது நபரை கலிபோர்னியாவின் மில்பிடாஸ் நகர காவல்துறையினர் கைது செய்துள்ளனர். மேலும், உயிரிழந்த இருவருக்கும் பொதுவான தோழியாக இருந்த கோட்டயத்தைச் சேர்ந்த அனிலா என்ற பெண்ணுக்கும் இச்சம்பவத்தில் தொடர்பிருக்கலாம் என்ற கோணத்தில் அமெரிக்க போலீசார் தீவிரமாக விசாரணை நடத்தி வருகின்றனர்.

பலியான பெண்களின் உடல்களை தாய்நாட்டிற்கு கொண்டு வருவதற்கான பணிகளை மத்திய அமைச்சர் சுரேஷ் கோபியின் வழிகாட்டுதலின்படி, சான் பிரான்சிஸ்கோவில் உள்ள இந்திய துணைத் தூதரகம் மேற்கொண்டு வருகிறது. இருப்பினும், இது ஒரு கொலை வழக்கு என்பதால் பிரேத பரிசோதனை மற்றும் தடயவியல் ஆய்வுகள் உள்ளிட்ட அமெரிக்காவின் சட்ட நடைமுறைகள் முழுமையாக நிறைவடைந்த பிறகே உடல்கள் ஒப்படைக்கப்படும் என தெரிவிக்கப்பட்டுள்ளது. இதனால், முறையான விசாரணை முடிந்து உடல்களைப் பெறுவதற்காக கேரளாவில் உள்ள அவர்களது உறவினர்கள் மிகுந்த வேதனையுடன் காத்திருக்கின்றனர்.