“கச்சா எண்ணெய் விலையில் திடீர் ஏற்றம்… யுஏஇ-யின் அதிரடி முடிவால் இந்தியாவுக்கு சிக்கலா?… பொதுமக்களுக்கு காத்திருக்கும் அந்த மே 1 அதிர்ச்சி “…!!!

சர்வதேசச் சந்தையில் கச்சா எண்ணெய் விலை உயர்வு மீண்டும் உலக நாடுகளை, குறிப்பாக இந்தியா போன்ற இறக்குமதி நாடுகளைக் கவலையில் ஆழ்த்தியுள்ளது. ஐக்கிய அரபு அமீரகம் (UAE) ஓபெக் (OPEC) அமைப்பிலிருந்து விலகுவதாக அறிவித்ததும், ஈரான் மீது அமெரிக்க அதிபர் டொனால்ட் டிரம்ப் கடுமையான பொருளாதார மற்றும் வர்த்தக முடக்கத்தை விதிக்க உத்தரவிட்டதும் இந்த விலை உயர்வுக்கு முக்கியக் காரணங்களாக அமைந்துள்ளன. இதன் விளைவாக, பிரெண்ட் கச்சா எண்ணெய் விலை பேரலுக்கு 111.78 டாலராகவும், அமெரிக்காவின் WTI எண்ணெய் விலை 100.50 டாலராகவும் உயர்ந்து, விநியோகத் தட்டுப்பாடு குறித்த அச்சத்தை ஏற்படுத்தியுள்ளது.

மத்திய கிழக்கில் நிலவும் “போர் இல்லை, அமைதியும் இல்லை” என்ற தற்காலிகச் சூழல் எண்ணெய் சந்தையைத் தொடர்ந்து பதற்றத்திலேயே வைத்துள்ளது. ஈரான் அணு ஆயுதத் திட்டத்தைக் கைவிட வேண்டும் என அமெரிக்கா வலியுறுத்த, தங்களுக்கு விதிக்கப்பட்ட தடைகளை நீக்க வேண்டும் என ஈரான் பிடிவாதம் காட்டுகிறது. இரு நாடுகளுக்கும் இடையிலான பேச்சுவார்த்தையில் ஏற்பட்டுள்ள முட்டுக்கட்டை மற்றும் ஹார்முஸ் நீரிணை போன்ற முக்கியப் போக்குவரத்துப் பாதைகளில் நிலவும் அச்சுறுத்தல் காரணமாக, எண்ணெய் விலை குறைய வாய்ப்பின்றி தொடர்ந்து எட்டாவது நாளாக ஏறுமுகத்திலேயே உள்ளது.

இந்த விலை உயர்வு இந்தியப் பொருளாதாரத்தில் நேரடித் தாக்கத்தை ஏற்படுத்தும் என எதிர்பார்க்கப்படுகிறது. பெட்ரோல் மற்றும் டீசல் விலையேற்றம் காரணமாகப் போக்குவரத்துச் செலவு அதிகரித்து, அத்தியாவசியப் பொருட்களின் விலை உயரும் பணவீக்கச் சூழல் உருவாகியுள்ளது. மத்திய அரசு விலையைக் கட்டுக்குள் வைத்திருப்பதாகக் கூறினாலும், கடந்த இரண்டு மாதங்களில் இந்திய சுத்திகரிப்பு நிறுவனங்கள் ஒரு நாளைக்கு சுமார் 1500 முதல் 2500 கோடி ரூபாய் வரை சந்தித்துள்ள நஷ்டம், மே மாதத் தொடக்கத்தில் எரிபொருள் விலை உயர்வுக்கு வழிவகுக்கும் என்று பொருளாதார நிபுணர்கள் எச்சரிக்கின்றனர்.

காங்கிரஸ் ஆட்சிக் காலத்தில் பின்பற்றப்பட்ட ‘ஆயில் பாண்ட்’ முறையை பாஜக கடுமையாக விமர்சித்திருப்பதால், தற்போது ஏற்பட்டுள்ள நஷ்டத்தைச் சமாளிக்க விலையை உயர்த்துவதைத் தவிர வேறு வழியில்லாத நிலைக்கு மத்திய அரசு தள்ளப்பட்டுள்ளது. ஒருவேளை விலையை உயர்த்தாவிட்டால், புதிய நிதித் திட்டங்களைக் கொண்டு வர வேண்டிய கட்டாயம் அரசுக்கு ஏற்படும். தேர்தல் மற்றும் அரசியல் சூழல்களைக் கடந்து, கச்சா எண்ணெய் விலையில் ஏற்பட்டுள்ள இந்தத் திடீர் பாய்ச்சல் சாமானிய மக்களின் அன்றாட பட்ஜெட்டில் பெரிய மாற்றத்தை ஏற்படுத்தும் என்பதில் ஐயமில்லை.