“என்கவுண்டர் செய்தால் தான் உடலை வாங்குவோம்”… போலீஸ் அலட்சியமா?.. தூக்கிட்டு வீசப்பட்ட சடலம்… கதறும் குடும்பம்… உச்சகட்ட பதற்றம்…!!

ஈரோடு மாவட்டம் பெருந்துறை அருகே, பணி முடிந்து வீடு திரும்பியபோது மாயமான உத்திரா என்ற 26 வயது இளம் செவிலியர், தேசிய நெடுஞ்சாலைப் புதரில் சடலமாகக் கண்டெடுக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. வழியில் வழிமறித்துக் கடத்தப்பட்ட அவர், கொடூரமாகப் பாலியல் அத்துமீறலுக்கு உள்ளாக்கப்பட்டு, நகைகள் பறிக்கப்பட்ட பின் படுகொலை செய்யப்பட்டிருப்பது முதற்கட்ட விசாரணையில் தெரியவந்துள்ளது.

இக்கொடூரச் சம்பவத்தைக் கண்டித்து, பெருந்துறை அரசு மருத்துவமனையில் குவிந்த உத்திராவின் குடும்பத்தினரும் பொதுமக்களும் அவரது உடலைப் பெற்றுக்கொள்ள மறுத்துப் போராட்டத்தில் ஈடுபட்டனர். இச்செயலில் ஈடுபட்ட கொலையாளிகளை வெறும் சிறையில் அடைப்பது போதுமானதல்ல என்றும், அவர்களை உடனடியாக என்கவுண்டர் செய்யும் வரை உடலை வாங்க மாட்டோம் என்றும் கூறி கடும் ஆவேசத்தை வெளிப்படுத்தினர். மேலும், புகார் அளித்த உடனேயே காவல்துறை துரிதமாகச் செயல்பட்டிருந்தால் உத்திராவை உயிரோடு காப்பாற்றியிருக்க முடியும் எனத் தங்களின் அதிருப்தியைத் தெரிவித்தனர்.

இப்போராட்டத்தால் அப்பகுதியில் பதற்றம் நிலவியதைத் தொடர்ந்து, காவல்துறை உயர் அதிகாரிகள் உறவினர்களிடம் பேச்சுவார்த்தை நடத்தினர். குற்றவாளிகளைப் பிடிக்க 5 தனிப்படைகள் அமைக்கப்பட்டு தீவிர விசாரணை நடைபெற்று வருவதாகவும், கொலையாளிகள் மீது மிகக் கடுமையான சட்ட நடவடிக்கை உறுதி செய்யப்படும் என்றும் அதிகாரிகள் உறுதியளித்தனர். உழைக்கும் இளம் பெண்ணுக்கு நேர்ந்த இத்துயரம் அப்பகுதி மக்களிடையே பெரும் சோகத்தையும் கொந்தளிப்பையும் ஏற்படுத்தியுள்ளது.