தமிழகத்தின் 234 தொகுதிகளில்…. தவெக தலைவர் விஜய் எடுத்த அதிரடி முடிவு….!

தமிழக வெற்றிக் கழகத்தின் (தவெக) தலைவர் விஜய், 2026 ஆம் ஆண்டு நடைபெறவுள்ள சட்டப்பேரவைத் தேர்தலுக்கான வேட்பாளர் பட்டியலை இறுதி செய்யும் பணிகளில் தீவிரமாக ஈடுபட்டுள்ளதாகத் தகவல்கள் வெளியாகியுள்ளன. இதற்காகத் தமிழகம் முழுவதும் உள்ள 234 தொகுதிகளிலும் கள நிலவரம், வெற்றி வாய்ப்புகள் மற்றும் வேட்பாளர்களின் செல்வாக்கு குறித்த விரிவான ஆய்வுகளை அவர் மேற்கொண்டு வருகிறார்.

கட்சியின் முக்கிய நிர்வாகிகள் மற்றும் ஆலோசகர்களுடன் ஆலோசித்து வரும் விஜய், இளைஞர்களுக்கும், பொதுமக்களிடையே நற்பெயர் பெற்றவர்களுக்கும் முன்னுரிமை அளித்து இந்தப் பட்டியலைத் தயார் செய்து வருவதாகக் கூறப்படுகிறது. இதற்கான விண்ணப்பங்கள் வழங்கப்பட்டு, அவற்றை பூர்த்தி செய்து தலைமைக்கு ஆன்லைன் வழியாக அனுப்ப உத்தரவிடப்பட்டுள்ளதாம். வேட்பாளர் தேர்வில் வெளிப்படை தன்மை, இளைஞர்கள், பெண்களுக்கு உரிய பிரதிநிதித்துவம் கிடைக்கவே ஆன்லைன் மூலம் விவரங்களை பெற முடிவு செய்யப்பட்டுள்ளதாம்.

இந்த வேட்பாளர் தேர்வுப் படலமானது கட்சியின் எதிர்கால வெற்றியைத் தீர்மானிக்கும் மிக முக்கியக் கட்டமாகக் கருதப்படுகிறது. இதற்கிடையில், சமூக வலைதளங்களில் சில உத்தேச வேட்பாளர் பட்டியல்கள் பரவி வந்தாலும், முறையான நேர்காணல்கள் மற்றும் ஆய்வுகளுக்குப் பிறகே அதிகாரப்பூர்வமான பட்டியலை விஜய் வெளியிடுவார் என்று கட்சித் தலைமை விளக்கம் அளித்துள்ளது. தேர்தல் களத்தில் மற்ற பிரதான கட்சிகளுக்குப் போட்டியாக ஒரு வலுவான அணியை நிறுத்த வேண்டும் என்ற நோக்கில், மிகுந்த கவனத்துடனும் ரகசியமாகவும் இந்தப் பணிகள் முடுக்கிவிடப்பட்டுள்ளன.