“ஒரு நாள் பிரச்சாரம்.. அடுத்த நாள் ரெஸ்ட்”… கடைசி 10 நாட்களில் சொதப்பும் விஜய்… தவெக தொண்டர்கள் அதிர்ச்சி…!

தமிழக சட்டசபை தேர்தல் களம் ஏப்ரல் 23-ஆம் தேதியை நோக்கி சூடுபிடித்துள்ள நிலையில், தமிழக வெற்றிக் கழகத் தலைவர் விஜய்யின் தொடர் பிரச்சார ரத்துகள் அரசியல் வட்டாரத்தில் பெரும் விவாதத்தை கிளப்பியுள்ளன. மார்ச் 30-இல் பெரம்பூரில் தனது பயணத்தைத் தொடங்கிய விஜய், 233 தொகுதிகளிலும் வேட்பாளர்களை ஆதரித்துப் பேசுவார் என்று எதிர்பார்க்கப்பட்டது. ஆனால், ஆரம்பத்திலேயே வில்லிவாக்கம் பிரச்சாரத்தை ரத்து செய்தவர், ஏப்ரல் 6 மற்றும் 7 ஆகிய தேதிகளில் சென்னை சைதாப்பேட்டை உள்ளிட்ட முக்கிய இடங்களிலும் தனது வருகையைத் தவிர்த்தார். இது களத்தில் பணியாற்றும் அக்கட்சியின் தொண்டர்களிடையே ஒருவித சுணக்கத்தை ஏற்படுத்தியுள்ளது.

பிரச்சாரத் திட்டமிடலில் நிலவும் குளறுபடிகள் அக்கட்சிக்கு பெரும் பின்னடைவாகப் பார்க்கப்படுகின்றன. குறிப்பாக, ஏப்ரல் 9-ஆம் தேதி கடலூரில் நடக்கவிருந்த பரப்புரை 11-ஆம் தேதிக்கு ஒத்திவைக்கப்பட்டு, பின்னர் அதுவும் ரத்து செய்யப்பட்டது. காரைக்குடியில் தாமதமாக வந்த விஜய், காத்திருந்த மக்களிடம் ஒரு வார்த்தை கூட பேசாமல் வெறும் கையசைவோடு திரும்பியது வாக்காளர்களை ஏமாற்றமடையச் செய்தது. தற்போதைய நிலவரப்படி, கும்மிடிப்பூண்டி உள்ளிட்ட எதிர்காலப் பயணங்களும் ரத்து செய்யப்பட்டுள்ள நிலையில், காவல்துறையையும் தேர்தல் ஆணையத்தையும் விமர்சிக்கும் விஜய், தனது ரத்துகளுக்கு முறையான காரணத்தைச் சொல்லாமல் மௌனம் காப்பது விமர்சனத்திற்கு உள்ளாகியுள்ளது.

மற்ற அரசியல் தலைவர்களுடன் ஒப்பிடுகையில் விஜய்யின் இந்த அணுகுமுறை கடும் விமர்சனங்களைச் சந்தித்து வருகிறது. காமராஜர், அண்ணா முதல் இன்றைய ஸ்டாலின், எடப்பாடி பழனிசாமி மற்றும் சீமான் வரை அனைத்துத் தலைவர்களும் உடல்நலக் குறைவு அல்லது தவிர்க்க முடியாத சூழல் தவிர்த்து, வெயில் – மழை பாராது மக்களை நேரடியாகச் சந்தித்து வருகின்றனர். தவெகவில் பெரும்பாலான வேட்பாளர்கள் புதிய முகங்களாக இருப்பதால், விஜய்யின் முகம் மட்டுமே அவர்களுக்கு வாக்குகளை ஈட்டித் தரும் காரணியாக உள்ளது. இத்தகைய சூழலில், நீலாங்கரை வீட்டிற்குள்ளேயே முடங்கியிருப்பது புதிய கட்சிக்கு ஆரோக்கியமானதல்ல என்ற கருத்து எழுந்துள்ளது.

தேர்தல் பரப்புரை முடிய இன்னும் 10 நாட்களே மிஞ்சியுள்ள நிலையில், சமூக வலைதளங்களில் மட்டும் ‘வெற்றி வாகை சூடுவோம்’ என்று பதிவிடுவதால் ஆட்சி அதிகாரத்தைக் கைப்பற்ற முடியாது என்பதே நிதர்சனம். சொந்தக் கட்சி வேட்பாளர்களுக்காகக் கூட முழுமையாகக் களமிறங்காத விஜய்யின் இத்தகைய செயல்பாடுகள், கூட்டணிக் குறித்துப் பேசிய மற்ற கட்சிகளுக்கும் ஒரு எச்சரிக்கையாகவே பார்க்கப்படுகிறது. வீடு வீடாகச் சென்று வாக்கு சேகரிக்கச் சொல்லும் தலைவரே, தனக்கு ஒதுக்கப்பட்ட இடங்களுக்கு வராமல் இருப்பது அக்கட்சியின் வெற்றி வாய்ப்பை கேள்விக்குறியாக்கியுள்ளது.