“திமுக கூட்டணியில் இருந்து திடீர் விலகல்”… 234 தொகுதிகளிலும் வேல்முருகன் தனித்துப் போட்டி… தமிழக அரசியலில் பெரும் திருப்பம்….!

தமிழக அரசியல் களத்தில் 2026 சட்டமன்றத் தேர்தலை முன்னிட்டுப் பெரும் பரபரப்பு நிலவி வரும் சூழலில், தமிழக வாழ்வுரிமை கட்சி (தவாக) தலைவர் வேல்முருகன் அதிரடியான அறிவிப்பு ஒன்றை வெளியிட்டுள்ளார். தி.மு.க தலைமையிலான கூட்டணியில் இருந்து விலகுவதாக அறிவித்த அவர், வரும் தேர்தலில் தனது கட்சி தனித்துப் போட்டியிடப் போவதாகவும், தமிழகத்தில் உள்ள 234 தொகுதிகளிலும் வேட்பாளர்களைக் களம் இறக்கப் போவதாகவும் தெரிவித்துள்ளார்.

இந்தியத் தேர்தல் ஆணையம் தமிழக வாழ்வுரிமை கட்சிக்கு ‘கேமரா’ (Camera) சின்னத்தை ஒதுக்கியுள்ளது. கடந்த தேர்தல்களில் உதயசூரியன் சின்னத்தில் போட்டியிட்ட தவாக, தற்போது தனது சொந்தச் சின்னத்தில் களம் காண்பது அக்கட்சியின் தொண்டர்களிடையே உற்சாகத்தை ஏற்படுத்தியுள்ளது. பண்ருட்டி சட்டமன்ற உறுப்பினரான வேல்முருகன், தனது அரசியல் பயணத்தில் இது ஒரு முக்கியமான நகர்வு என்று குறிப்பிட்டுள்ளார்.

இந்தத் தேர்தலில் தவாக சார்பில் போட்டியிட விருப்பம் தெரிவித்தவர்களிடம் இருந்து விண்ணப்பங்கள் பெறப்பட்டு, தகுதியான 234 வேட்பாளர்களின் பட்டியலும் முறைப்படி அறிவிக்கப்பட்டுள்ளது. இளைஞர்களுக்கும், கட்சியின் தீவிர விசுவாசிகளுக்கும் இந்தப் பட்டியலில் முக்கியத்துவம் அளிக்கப்பட்டுள்ளது. மற்ற பெரிய கூட்டணிகளுக்குப் போட்டியாகத் தங்களது பலத்தை நிரூபிக்க வேல்முருகன் தற்போது தீவிரமான தேர்தல் பணிகளில் ஈடுபட்டு வருகிறார்.

வேல்முருகனின் இந்தத் தனித்துப் போட்டியிடும் முடிவு, குறிப்பாக வட தமிழகத்தில் உள்ள வாக்கு வங்கியில் சில மாற்றங்களை ஏற்படுத்தும் என்று அரசியல் விமர்சகர்கள் கருதுகின்றனர். ‘கேமரா’ சின்னத்தைச் மக்களிடம் கொண்டு சேர்க்கும் வகையில் தவாக தனது பிரச்சார வியூகங்களை வகுத்து வருகிறது. திராவிடக் கட்சிகளுக்கு மாற்றாக ஒரு புதிய அரசியல் சக்தியாகத் தன்னை நிலைநிறுத்திக்கொள்ள வேல்முருகன் எடுக்கும் இந்த முயற்சி, தேர்தல் முடிவுகளில் எந்த மாதிரியான தாக்கத்தை ஏற்படுத்தும் என்பது எதிர்பார்ப்பை அதிகப்படுத்தியுள்ளது.