“அப்போ ஸ்டாலின் சட்டையைக் கிழிச்சாங்க… ஆனா இப்போ?”…. சட்டசபை ரகசியத்தை உடைத்த அமைச்சர் வன்னியரசு….!

தூத்துக்குடி மாவட்டம் கோவில்பட்டி அருகே உள்ள தெற்கு திட்டங்குளத்தில், தியாகி இமானுவேல் சேகரனாரின் 69-வது நினைவு நாளை முன்னிட்டு அவரது திருவுருவச் சிலைக்குச் சமூக நீதித்துறை அமைச்சர் வன்னியரசு மாலை அணிவித்து மரியாதை செலுத்தினார். அதன் பின்னர் செய்தியாளர்களைச் சந்தித்த அவர், மாநிலத்தின் வளர்ச்சி மற்றும் சட்டப்பேரவையின் தற்போதைய செயல்பாடுகள் குறித்துப் பல்வேறு கருத்துகளைத் விரிவாகப் பகிர்ந்துகொண்டார்.

புதிய தலைமைச் செயலகக் கட்டுமானம் குறித்த கேள்விக்குப் பதிலளித்த அமைச்சர் வன்னியரசு, “ரூ.1,200 கோடியில் புதிய தலைமைச் செயலகம் அமைப்பது என்பது புதிய முயற்சியல்ல; முன்னாள் முதல்வர்கள் கருணாநிதி மற்றும் ஜெயலலிதா ஆகியோர் முன்னெடுத்த திட்டத்தின் தொடர்ச்சியே இது. தற்போதைய தலைமைச் செயலகம் ராணுவக் கட்டுப்பாட்டில் உள்ள இடத்தில் வாடகைக்குச் செயல்பட்டு வருகிறது. வளர்ச்சிக்கான கடன் என்பது ஒரு தடையல்ல, நாட்டின் அனைத்து மாநிலங்களும் கடனில்தான் இயங்குகின்றன. எனவே, தமிழ்நாட்டிற்கு எனத் தனி தலைமைச் செயலகம் தேவை என்பதில் மாற்றுக் கருத்து இருக்க முடியாது” என்று தெளிவுபடுத்தினார்.

நாம் தமிழர் கட்சியின் ஒருங்கிணைப்பாளர் சீமான் குறித்து விமர்சித்த அவர், “சினிமாவிலிருந்து வந்து சட்டமன்றத்திற்குச் செல்ல ஆசைப்பட்ட சீமானை மக்கள் ஏற்றுக்கொள்ளவில்லை. வெறுப்பு அரசியலையும் வன்மத்தையும் விதைத்து வரும் அவர், தமிழ்நாட்டின் வளர்ச்சிக்கு எதிராகவே செயல்பட்டு வருகிறார். தந்தை பெரியாரையே விமர்சித்தவருக்கு அரசை விமர்சிக்க எந்தத் தகுதியும் இல்லை. அதேவேளையில், சட்டப்பேரவையின் செயல்பாடுகள் தற்போது மிகவும் ஆரோக்கியமாக நடைபெற்று வருகின்றன. முந்தைய காலங்களில் மு.க.ஸ்டாலின் எதிர்க்கட்சித் தலைவராக இருந்தபோது சட்டை கிழிக்கப்பட்டது போன்ற அசம்பாவிதங்கள் எதுவுமின்றி, தற்போது நாகரிகமான விவாதங்கள் மட்டுமே முன்னெடுக்கப்பட்டு வருகின்றன” எனக் குறிப்பிட்டார்.

தொடர்ந்து பேசிய அவர், மாநிலத்தில் மின் தட்டுப்பாடு இனி ஏற்படாத வகையில் நடவடிக்கைகள் எடுக்கப்பட்டு வருவதாக மின்சாரத் துறை அமைச்சர் உறுதியளித்துள்ளதாகத் தெரிவித்தார். மேலும், “ஒன்றிய அரசின் FCRA சட்டத்திற்கு எதிராகத் தமிழ்நாடு சட்டமன்றத்தில் முதன்முறையாகத் தீர்மானம் நிறைவேற்றப்பட்டுள்ளது. வரும் 25-ஆம் தேதி ‘தாய்மாமன் சீர் திட்டம்’ தொடங்கப்பட உள்ளது. வரும் இடைத்தேர்தலில் அதிமுகவிலிருந்து த.வெ.க-விற்குச் சென்றவர்களே போட்டியிடுவதால், எங்களது மதச்சார்பற்ற சமூக நீதி கூட்டணிக்கே வெற்றி வாய்ப்பு மிக அதிகமாக உள்ளது” என்று நம்பிக்கை தெரிவித்தார்.