காலையிலேயே பரபரப்பு… டிரம்ப்பை சுற்றி வளைத்த கமாண்டோக்கள்.. வாஷிங்டன் ஹோட்டலில் திக் திக் நிமிடங்கள்….!

வாஷிங்டனில் நடைபெற்ற வெள்ளை மாளிகை செய்தியாளர்கள் சங்கத்தின் இரவு விருந்து நிகழ்ச்சியில், திடீரென துப்பாக்கிச் சூடு நடத்தப்பட்டதாகக் கூறப்படும் சம்பவத்தால் பெரும் பரபரப்பு ஏற்பட்டது. வாஷிங்டன் ஹில்டன் ஹோட்டலில் அதிபர் டொனால்ட் டிரம்ப் மற்றும் முதல் பெண்மணி மெலானியா டிரம்ப் உள்ளிட்ட முக்கியப் பிரமுகர்கள் பங்கேற்றிருந்த நிலையில், திடீரென பலத்த வெடிச்சத்தம் கேட்டது. இதனால் அங்கிருந்தவர்கள் அதிர்ச்சியடைந்து மேசைகளுக்கு அடியில் தஞ்சம் புகுந்தனர். உடனடியாக பாதுகாப்புப் படையினர் மேடையைச் சூழ்ந்துகொண்டு, அதிபர் டிரம்ப்பை பாதுகாப்பாக அங்கிருந்து வெளியேற்றினர்.

சம்பவ இடத்திலிருந்து வெளியான காணொளிகளில், சத்தம் கேட்டவுடன் அதிபர் டிரம்ப் குனிந்து தற்காத்துக் கொள்வதும், பின்னர் ஆயுதம் ஏந்திய பாதுகாவலர்கள் அவரை அவசர அவசரமாக அழைத்துச் செல்வதும் பதிவாகியுள்ளது. இந்தச் சம்பவத்தைத் தொடர்ந்து அந்தப் பகுதியில் பலத்த பாதுகாப்பு ஏற்பாடுகள் செய்யப்பட்டன. அதிபர் டிரம்ப் மற்றும் துணை அதிபர் ஜே.டி. வான்ஸ் ஆகிய இருவருக்கும் எந்தப் பாதிப்பும் ஏற்படவில்லை என்றும், அவர்கள் இருவரும் பாதுகாப்பாக இருப்பதாகவும் அசோசியேட்டட் பிரஸ் வட்டாரங்கள் உறுதிப்படுத்தியுள்ளன.

இந்த துப்பாக்கிச் சூடு தொடர்பாக சந்தேக நபர் ஒருவரை காவல்துறையினர் கைது செய்து காவலில் வைத்துள்ளதாக ஏஎஃப்பி செய்தி நிறுவனம் தெரிவித்துள்ளது. ஹோட்டலுக்குள் துப்பாக்கிச் சூடு நடத்தியதாகக் கூறப்படும் அந்த நபர் குறித்து விரிவான விசாரணை நடத்தப்பட்டு வருகிறது. முதற்கட்ட தகவல்களின்படி, இந்தத் தாக்குதலில் யாருக்கும் பெரிய அளவில் காயங்கள் ஏற்படவில்லை என்று தெரியவந்துள்ளது. சிறிது நேரத் தடையிற்குப் பிறகு நிகழ்ச்சி மீண்டும் தொடங்கும் என்று வெள்ளை மாளிகை செய்தியாளர் சங்கத் தலைவர் வெய்ஜியா ஜியாங் தெரிவித்துள்ளார்.