இனியாவது விழித்துக்கொள்ளுங்கள்..! முற்றிய பிறகே தெரியும் கொடிய நோய்… தப்பிக்க மருத்துவர்கள் தரும் அவசர அட்வைஸ்…!!

தமிழ்நாட்டில் புற்றுநோய் பாதிப்புகளின் எண்ணிக்கை வரலாறு காணாத வகையில் ஒரே ஆண்டில் ஒரு லட்சத்தை கடந்துள்ளதாக மத்திய சுகாதார அமைச்சகத்தின் 2025-ஆம் ஆண்டுக்கான தரவுகள் அதிர்ச்சியளிக்கின்றன. கடந்த 2020-ஆம் ஆண்டில் சுமார் 68 ஆயிரமாக இருந்த இந்த நோய்த்தொற்று, ஒவ்வொரு ஆண்டும் படிப்படியாக உயர்ந்து தற்போது இந்த உச்சத்தை எட்டியுள்ளது. இந்தத் தொடர் அதிகரிப்பானது, மாநிலத்தின் பொது சுகாதாரக் கட்டமைப்பிற்கு விடப்பட்ட மாபெரும் சவாலாக உருவெடுத்துள்ளதுடன், ஒருங்கிணைந்த நோய்த்தடுப்பு மற்றும் முன்கூட்டியே கண்டறியும் நடவடிக்கைகளின் அவசியத்தை அரசுக்கு உணர்த்துகிறது.

இந்தப் புதிய பாதிப்புகளில் ஆண்களை விடப் பெண்களே அதிக அளவில் பாதிக்கப்பட்டுள்ளனர். மாவட்டங்களைப் பொறுத்தவரை தலைநகர் சென்னை அதிக பாதிப்புகளுடன் முதலிடத்திலும், காஞ்சிபுரம் மற்றும் வேலூர் அடுத்தடுத்த இடங்களிலும் உள்ளன. ஆண்களுக்குப் புகையிலைப் பயன்பாட்டால் ஏற்படும் வாய்ப் புற்றுநோயும், குடல் மற்றும் வயிற்றுப் புற்றுநோய்களும் பெருமளவில் ஏற்படுகின்றன. அதேவேளையில், பெண்களுக்கு மார்பகப் புற்றுநோய் அதிக அளவிலும், கருப்பை வாய் புற்றுநோய்கள் அடுத்தபடியாகவும் காணப்படுகின்றன. நகரப் பகுதிகளில் நிலவும் சுற்றுச்சூழல் மாசு, மன அழுத்தம் மற்றும் மாறுபட்ட வாழ்க்கை முறைகளே இந்த அபாயகரமான அதிகரிப்புக்கு முக்கியக் காரணங்களாக மருத்துவர்கள் சுட்டிக்காட்டுகின்றனர்.

பெரும்பாலான நோயாளிகள் நோயின் முற்றிய நிலையிலேயே மருத்துவமனைக்கு வருவதால், சிகிச்சையளிப்பதில் பெரும் சிக்கல் ஏற்படுவதோடு உயிரிழப்புகளும் சிகிச்சைச் செலவுகளும் அதிகரிக்கின்றன. குறிப்பாக, 2025-ஆம் ஆண்டில் மட்டும் பெண்கள் சம்பந்தப்பட்ட புற்றுநோய்களால் பத்தாயிரத்திற்கும் மேற்பட்ட மரணங்கள் நிகழ்ந்துள்ளன. இதனைத் தடுக்க, ஆரம்பக்காலப் பரிசோதனைகளைத் தொடர்ந்து மேற்கொள்வதுடன், மது மற்றும் புகையிலையை அறவே தவிர்த்தல், முறையான உடற்பயிற்சி மற்றும் ஆரோக்கியமான உணவுப் பழக்கவழக்கங்களைப் பின்பற்றுவது மட்டுமே சிறந்த தீர்வாகும் என மருத்துவ வல்லுநர்கள் எச்சரிக்கின்றனர்.