“செல்வாக்கு இருந்தாலும் தப்ப முடியாது”.. கோயில் தங்கம் டூ உண்டியல் வசூல்.. 360 டிகிரியில் அதிரடி விசாரணை.. TVK அமைச்சர் ரமேஷ் அதிரடி எச்சரிக்கை..!!!

கோவை விமான நிலையத்தில் செய்தியாளர்களைச் சந்தித்த தமிழக வெற்றி கழகத்தின் அமைச்சர் ரமேஷ், கோயில்களில் தற்போதைய வணிகச் செயல்பாடுகளைக் காட்டிலும் பக்தர்களின் ஆன்மிகத் தேவைகளுக்கே முன்னுரிமை வழங்கப்படும் எனத் தெரிவித்தார். குறிப்பாக, ஏழை மற்றும் விளிம்புநிலை மக்களின் நலனைக் கருத்தில் கொண்டு, கூட்ட நெரிசலைக் கட்டுப்படுத்த இணையவழி டோக்கன் முறை மேம்படுத்தப்படும் என்றார். ஒவ்வொரு கோயிலின் கொள்ளளவுக்கு ஏற்ப ஒரு மணி நேரத்திற்கு இத்தனை பேர் என கணக்கிடப்பட்டு இணையதளம் மூலமாகவும், வாட்ஸ்அப் மூலமாகவும் டோக்கன்கள் வழங்கப்படும். மேலும், 60 வயதுக்கு மேற்பட்ட முதியவர்கள், கர்ப்பிணிகள், கைக்குழந்தைகளுடன் வரும் தாய்மார்கள் மற்றும் மாற்றுத்திறனாளிகளுக்குத் தரிசனத்தில் முன்னுரிமை அளிக்கப்படும் என்றும், இணைய வசதி இல்லாத உள்ளூர் பக்தர்களுக்காகக் கோயில்களிலேயே நேரடி முன்பதிவு மையங்கள் அமைக்கப்பட்டு, இடைத்தரகர்களின் ஊழல் நடைமுறைகள் முழுமையாக ஒழிக்கப்படும் என்றும் அவர் உறுதியளித்தார்.

அறநிலையத்துறை கோயில்களில் கடந்த காலங்களில் நடைபெற்றதாகக் கூறப்படும் முறைகேடுகள் தொடர்பாக 360 டிகிரி கோணத்தில் விரிவான விசாரணை தொடங்கப்பட்டுள்ளதாக அமைச்சர் தெரிவித்தார். அன்னதானத் திட்டங்கள், உண்டியல் வசூல் மற்றும் கோயில் தங்கத்தை உருக்கி நிலையான வைப்பு நிதியாக மாற்றிய விவகாரங்கள் உள்ளிட்ட அனைத்தும் தீவிரமாக ஆய்வு செய்யப்பட்டு, முறைகேடுகள் பொதுமக்களின் பார்வைக்குக் கொண்டு வரப்படும் என்றார். இதில் தொடர்புடையவர்கள் எவ்வளவு செல்வாக்கு மிக்கவர்களாக இருந்தாலும் அவர்கள் மீது பாரபட்சமின்றி கடுமையான சட்ட நடவடிக்கை எடுக்கப்படும். மேலும், திருச்செந்தூர் கோயிலில் மேற்கொள்ளப்பட்டது போன்ற திடீர் ஆய்வுகள் அனைத்து கோயில்களிலும் தொடரும் என்றும், பல ஆண்டுகளாக நிறுத்தப்பட்டிருந்த கோயில் யானைகளுக்கான புத்துணர்ச்சி முகாமை மீண்டும் நடத்த முதலமைச்சர் விஜய் உத்தரவிட்டுள்ளார் என்றும் அவர் குறிப்பிட்டார்.

திருப்பரங்குன்றம் விவகாரம் குறித்த கட்சியின் நிலைப்பாட்டை முதலமைச்சரே அதிகாரப்பூர்வமாக அறிவிப்பார் என்று கூறிய அமைச்சர் ரமேஷ், தாம் நிர்வாக ரீதியான நடவடிக்கைகளில் மட்டுமே கவனம் செலுத்தி வருவதாகக் குறிப்பிட்டார். தந்தை பெரியார், அண்ணல் அம்பேத்கர், பெருந்தலைவர் காமராஜர், வீரமங்கை வேலுநாச்சியார் மற்றும் அஞ்சலை அம்மாள் ஆகியோரின் கொள்கைகளை அடிப்படையாகக் கொண்டே தமிழக வெற்றி கழகம் செயல்பட்டு வருகிறது என்றும், அந்தக் கொள்கைகளை ஏற்பவர்கள் மட்டுமே கட்சியில் இணைக்கப்படுவார்கள் என்றும் அவர் தெளிவுபடுத்தினார். தற்போதைய அரசு நீடிக்காது என்ற எதிர்க்கட்சிகளின் விமர்சனங்கள் குறித்துத் தங்களுக்கு எந்தக் கவலையும் இல்லை என்று கூறிய அவர், மக்கள் நலப் பணிகளைத் தொடர்ந்து தொய்வின்றி முன்னெடுப்போம் என்று உறுதியுடன் தெரிவித்தார்.