Breaking: “சரணடையலைன்னா சாவு தான்”…. ஈரானுக்கு ட்ரம்ப் விடுத்த கடைசி எச்சரிக்கை… இறங்கி அடிக்க தயாராகும் ஈரான்…. உச்சக்கட்ட பதற்றம்….!

அமெரிக்கா மற்றும் ஈரான் இடையேயான போர் பதற்றம் உச்சகட்டத்தை எட்டியுள்ள நிலையில், அமெரிக்க அதிபர் டொனால்ட் ட்ரம்ப் ஈரான் ராணுவத்திற்கு மிகக் கடுமையான எச்சரிக்கை ஒன்றை விடுத்துள்ளார். ஈரானின் புரட்சிகர காவல் படை (IRGC) உள்ளிட்ட ராணுவத்தினர் உடனடியாகத் தங்கள் ஆயுதங்களைக் கீழே போட்டுவிட்டுச் சரணடைய வேண்டும் என்றும், அவ்வாறு செய்யத் தவறினால் அவர்கள் மரணத்தைத்தான் சந்திக்க நேரிடும் என்றும் அவர் அதிரடியாகத் தெரிவித்துள்ளார். அமெரிக்கா நடத்திய தாக்குதலில் ஏற்கனவே 48 ஈரான் தலைவர்கள் கொல்லப்பட்டிருப்பதாகக் குறிப்பிட்ட அவர், ஈரானின் அணு ஆயுத அச்சுறுத்தலை ஒழிப்பதே தங்களின் இலக்கு என முழங்கியுள்ளார்.

ஈரான் ஒரு மிகப்பெரிய பயங்கரவாத நாடு என்றும், அதன் ராணுவத் தலைமை தற்போது முற்றிலும் பலவீனமடைந்துள்ளதாகவும் ட்ரம்ப் விமர்சித்துள்ளார். கடந்த 50 ஆண்டுகளாக அமெரிக்காவிற்கும் இஸ்ரேலுக்கும் எதிராகச் செயல்பட்டு வந்த சக்திகள் இனி தலைதூக்க முடியாது எனத் தெரிவித்த அவர், ஈரான் மக்கள் இந்தத் தருணத்தைப் பயன்படுத்தித் தங்களுக்குத் தேவையான சுதந்திரமான ஆட்சியை அமைத்துக் கொள்ள வேண்டும் என அழைப்பு விடுத்துள்ளார். ஈரான் மக்களுடன் அமெரிக்கா எப்போதும் துணை நிற்கும் என்றும், பயங்கரவாத ஆட்சியிலிருந்து அவர்களுக்கு விடிவு காலம் பிறந்துவிட்டதாகவும் அவர் தனது உரையில் சுட்டிக்காட்டினார்.

அமெரிக்காவின் இந்த எச்சரிக்கையை ஈரான் முற்றிலுமாக நிராகரித்துள்ளது. ஈரான் அதிபர் மசூத் பெஷேஷ்கியன் கூறுகையில், தங்கள் நாட்டின் உச்ச தலைவர் கமேனி கொல்லப்பட்டதற்குப் பழிவாங்காமல் ஓயப்போவதில்லை என உறுதிபடத் தெரிவித்துள்ளார். ட்ரம்ப் முன்வைத்த பேச்சுவார்த்தைக்கான அழைப்பையும் ஈரான் புறக்கணித்துள்ளதுடன், அமெரிக்கா மற்றும் இஸ்ரேல் கூட்டுப் படைகளுக்கு எதிராகப் பதிலடி கொடுக்கத் தீவிரமாகத் தயாராகி வருகிறது. இதனால் மத்திய கிழக்கு பிராந்தியத்தில் போர் மேகங்கள் மேலும் சூழ்ந்துள்ளன.

ஈரானிடம் உள்ள நீண்ட தூர ஏவுகணைகள் மற்றும் அணு ஆயுதங்கள் உலக அமைதிக்கும், ஒவ்வொரு அமெரிக்க குடிமகனுக்கும் அச்சுறுத்தலாக இருப்பதாக ட்ரம்ப் கருதுகிறார். அந்த ஆயுதங்களைக் கொண்டு உலகை அச்சுறுத்த அனுமதிக்க முடியாது என்பதால், நிர்ணயிக்கப்பட்ட இலக்கை அடையும் வரை ராணுவ நடவடிக்கைகள் தொடரும் என அவர் திட்டவட்டமாகக் கூறியுள்ளார். ஒருபுறம் சரணடையச் சொல்லும் எச்சரிக்கையும், மறுபுறம் பழிவாங்கும் நோக்கில் ஈரான் காட்டும் தீவிரமும் சர்வதேச அளவில் பெரும் பரபரப்பை ஏற்படுத்தியுள்ளது.