அடிமடியில் கைவைத்த டிரம்ப்..! இந்தியா, சீனா மீது 12.5% கூடுதல் வரி… சர்வதேச வர்த்தகத்தில் பெரும் அதிர்ச்சி…!!

அமெரிக்காவில் அமலில் உள்ள கட்டாய உழைப்பு (Forced Labour) தடைச் சட்டத்தை முறையாகப் பின்பற்றுவதில் தோல்வியடைந்து விட்டதாகக் கூறி, இந்தியா மற்றும் சீனா உள்ளிட்ட 59 நாடுகள் மீது அமெரிக்கா கூடுதல் இறக்குமதி வரி விதிக்கத் திட்டமிட்டுள்ளது. அமெரிக்காவில் குழந்தைத் தொழிலாளர்கள் மற்றும் சிறைக் கைதிகளைக் கொண்டு தயாரிக்கப்படும் பொருட்களை இறக்குமதி செய்யத் தடை விதிக்கப்பட்டுள்ளது. இந்த விதிகளைச் சரியாக நடைமுறைப்படுத்தாத காரணத்தால், சம்பந்தப்பட்ட நாடுகள் மீது 10 சதவீதம் முதல் 12.5 சதவீதம் வரை கூடுதல் வரி விதிக்க அமெரிக்க வர்த்தகப் பிரதிநிதி (USTR) தற்போது பரிந்துரை செய்துள்ளார்.

இந்தப் புதிய வரி விதிப்புப் பரிந்துரையின்படி, இந்தியா, சீனா, ஜப்பான், தென்கொரியா, பிரேசில் மற்றும் சுவிட்சர்லாந்து உள்ளிட்ட நாடுகளுக்கு 12.5 சதவீதம் கூடுதல் வரி விதிக்கப்பட வாய்ப்புள்ளது. அதே நேரத்தில் கனடா, மெக்சிகோ, தைவான் மற்றும் இங்கிலாந்து போன்ற நாடுகளுக்கு எதிராக 10 சதவீதம் வரி விதிக்கப் பரிந்துரைக்கப்பட்டுள்ளது. இந்த அதிரடிப் பரிந்துரையானது தற்போதைய நிலையில் பொதுமக்கள் விவாதத்திற்கு வைக்கப்பட்டு, அதன் பின்னரே இறுதி வடிவம் பெறும் என அறிவிக்கப்பட்டுள்ளது.

முன்னதாக, அமெரிக்காவுடன் வர்த்தக ஒப்பந்தம் இல்லாத நாடுகள் மீது அதிபர் டொனால்டு டிரம்ப் விதித்த கூடுதல் இறக்குமதி வரி செல்லாது என அமெரிக்க உச்ச நீதிமன்றம் அதிரடி உத்தரவு பிறப்பித்திருந்தது. மேலும், அதுவரை வசூலித்த வரியையும் திரும்பச் செலுத்த நீதிமன்றம் உத்தரவிட்டதால் அந்த வரி விதிப்பை அமெரிக்கா கைவிட்டது. இந்தச் சூழலில், தற்போது கட்டாய உழைப்புச் சட்டத்தைக் காரணமாகக் காட்டி அமெரிக்கா மீண்டும் புதிய வரிகளை விதிக்கத் திட்டமிட்டுள்ளது சர்வதேச வர்த்தக வட்டாரத்தில் பெரும் பரபரப்பை ஏற்படுத்தியுள்ளது.