திடுக்கிடும் ஆந்திர வழக்கு..! தற்கொலையா? திட்டமிட்ட சதியா?… அரசு அதிகாரி குடும்பத்தின் கோர முடிவு… வெளிவந்த அதிர்ச்சி உண்மைகள்…!!

ஆந்திர மாநிலம் காக்கிநாடாவைச் சேர்ந்த அரசு அதிகாரியான நூக்கராஜு, தனது மனைவி மற்றும் மகளுடன் கோதாவரி ஆற்றில் குதித்து தற்கொலை செய்துகொண்ட சம்பவம் பெரும் சோகத்தை ஏற்படுத்தியுள்ளது. இந்த பயங்கர நிகழ்வில் அவர்களுடன் ஆற்றில் குதித்த 10 வயது சிறுவன் மட்டும் அதிர்ஷ்டவசமாக உயிருடன் மீட்கப்பட்டான். தற்கொலைக்கு முன்பாக அந்த குடும்பத்தினர் எழுதி வைத்திருந்த கடிதத்தின் மூலம், இந்த சோக நிகழ்வுக்குப் பின்னணியில் உள்ள பல திடுக்கிடும் தகவல்கள் காவல்துறையினருக்குக் கிடைத்தன.

அந்தக் கடிதத்தில், சிறுவனின் துப்பாக்கிச் சுடும் பயிற்சியாளரான ஷேக் சாதிக் கான் என்பவர் தங்களை மிரட்டிப் பணம் பறித்ததாகவும், பல்வேறு வகைகளில் தொந்தரவு அளித்ததாகவும் தெரிவிக்கப்பட்டிருந்தது. இதோடு மட்டுமில்லாமல், சில மாதங்களுக்கு முன்பு சந்தேகத்திற்கு இடமான வகையில் இறந்த நூக்கராஜுவின் மருமகன் ஜகதீஷின் மரணத்திலும் சாதிக் கானுக்குத் தொடர்பு இருக்கலாம் என அவரது குடும்பத்தினர் குற்றம் சாட்டியுள்ளனர். மிரட்டல், பணம் பறித்தல், தற்கொலைக்குத் தூண்டுதல் மற்றும் கட்டாய மதமாற்றம் போன்ற பல கடுமையான பிரிவுகளின் கீழ் சாதிக் கான் மீது தற்போது வழக்குகள் பதியப்பட்டுள்ளன.

செல்போன் பயன்பாடு மற்றும் டிஜிட்டல் பரிவர்த்தனைகளைத் தவிர்த்து கவனமாகத் தலைமறைவாக இருந்த சாதிக் கானை, தனிப்படைகள் அமைத்து 5 மாநிலங்களில் தேடிய போலீசார், இறுதியாக உத்தரப் பிரதேச மாநிலம் மீரட்டில் வைத்து கைது செய்தனர். இந்த வழக்கில் இன்னும் பலருக்குத் தொடர்பு இருக்கலாம் எனச் சந்தேகிக்கப்படும் நிலையில், வழக்கின் தீவிரத்தைக் கருத்தில் கொண்டு இதனை சிபிஐ அல்லது தேசியப் புலனாய்வு முகமை விசாரணைக்கு மாற்ற வேண்டும் என முன்னாள் நாடாளுமன்ற உறுப்பினர் விஜயசாய் ரெட்டி கோரிக்கை விடுத்துள்ளார்.