யாரு சாமி நீ..? கார்ப்பரேட் ஊழியர்களுக்கே டஃப் கொடுக்கும் செக்யூரிட்டி கார்டின் வருமானம்.. உங்க வேலைல காலிப்பணியிடம் இருக்கா..? ஆச்சர்யத்தில் நெட்டிசன்கள்..!!

சென்னையில் பாதுகாப்புப் பணியில் (Security Guard) ஈடுபட்டுள்ள பிகி நந்தி (Biki Nandi) என்ற இளைஞரின் வியக்கத்தக்க வளர்ச்சி குறித்த வீடியோ சமூக வலைதளங்களில் தற்போது வைரலாகி வருகிறது. பெரிய பட்டங்கள் இல்லாமலேயே, கடின உழைப்பால் ஒருவரின் வருமானம் எந்த அளவுக்கு உயர முடியும் என்பதற்கு இவரது வாழ்க்கை ஒரு சிறந்த உதாரணமாக அமைந்துள்ளது. 2021-ல் வெறும் 13,000 ரூபாய் சம்பளத்தில் தனது பணியைத் தொடங்கிய பிகி நந்தி, இன்று கார்ப்பரேட் நிறுவன ஊழியர்களே வியக்கும் அளவிற்கு வளர்ந்துள்ளார்.

அவர் வெளியிட்டுள்ள வீடியோவில், தனது ஐந்து ஆண்டுகால பயணத்தின் சம்பள உயர்வு குறித்த விவரங்களைப் பகிர்ந்துள்ளார். 2022-ல் 15,000 ரூபாயாகவும், 2023-ல் 18,000 ரூபாயாகவும் இருந்த இவரது ஊதியம், 2024-ல் ஒரு பெரிய பாய்ச்சலாக 24,000 ரூபாயை எட்டியது. அதன் தொடர்ச்சியாக 2025-ல் 26,000 ரூபாயாகவும், தற்போது 2026-ல் 32,000 ரூபாயாகவும் உயர்ந்துள்ளது. பாதுகாப்பு சீருடையில் அவர் காட்டியுள்ள இந்த நேர்மையான வளர்ச்சி பலரின் கவனத்தை ஈர்த்துள்ளது.

இன்ஸ்டாகிராமில் லட்சக்கணக்கானோரால் பார்க்கப்பட்டுள்ள இந்த வீடியோவை கண்ட நெட்டிசன்கள், கார்ப்பரேட் நிறுவனங்களில் பணிபுரிபவர்களுக்குக் கூட இவ்வளவு விரைவான ஊதிய உயர்வு கிடைப்பதில்லை என்று பாராட்டி வருகின்றனர். “என்னுடைய இன்ஜினியரிங் பட்டத்தை விட உங்கள் வளர்ச்சி அபாரம்”, “உங்களுடைய வேலையில் காலிப்பணியிடங்கள் இருக்கிறதா?” எனப் பலரும் நகைச்சுவையாகவும் ஆச்சரியத்துடனும் கமெண்ட் செய்து வருகின்றனர். பட்டங்களை விட விடாமுயற்சியே ஒருவரை உயர்த்தும் என்பதை பிகி நந்தியின் கதை மெய்ப்பித்துள்ளது.