போடு ரகிட ரகிட… இனி அரசு மருத்துவமனைகளில் ‘நோ வெயிட்டிங்’… மொபைல் ஆப் மூலம் டோக்கன் முன்பதிவு…. தமிழக அரசின் புதிய ‘டோக்கன் சிஸ்டம்’…!

தமிழக அரசு மருத்துவமனைகளில் வெளிநோயாளிகள் நீண்ட நேரம் வரிசையில் காத்திருக்கும் அவதிக்கு முற்றுப்புள்ளி வைக்க, மக்கள் நல்வாழ்வுத் துறை அமைச்சர் அருண்ராஜ் தலைமையில் அதிரடி நடவடிக்கைகள் மேற்கொள்ளப்பட்டுள்ளன. சென்னை தேனாம்பேட்டையில் உள்ள டி.எம்.எஸ். வளாகத்தில் நேற்று நடைபெற்ற உயர்மட்ட ஆலோசனைக் கூட்டத்தில், தனியார் மருத்துவமனைகளுக்கு நிகரான அதிநவீன வசதிகளை அரசு மருத்துவமனைகளில் கொண்டு வருவதற்கான முக்கிய முடிவுகள் எடுக்கப்பட்டன. அரசு மருத்துவக் கல்லூரி முதல்வர்கள் பங்கேற்ற இக்கூட்டத்தில் தற்போதைய கட்டமைப்பு, ஊழியர்கள் பற்றாக்குறை மற்றும் சிகிச்சையின் தரம் குறித்து விரிவாக விவாதிக்கப்பட்டது.

பொதுமக்களின் மருத்துவத் தேவைகளை மையப்படுத்திப் பேசிய அமைச்சர், மருத்துவமனைகளில் நோயாளிகளின் வசதிகளை மேம்படுத்த ‘நோயாளிகள் அனுபவக் கமிட்டி’ என்ற புதிய குழு அமைக்கப்படும் என்று அறிவித்தார். இந்தக் குழு ஒவ்வொரு வாரமும் கூடி, மருத்துவமனைக்கு வரும் நோயாளிகளுக்குத் தேவையான குடிநீர், கழிவறை மற்றும் சுகாதாரம் உள்ளிட்ட அடிப்படைப் பிரச்சினைகளை ஆய்வு செய்து உடனுக்குடன் நடவடிக்கை எடுக்கும். இதன் மூலம் நோயாளிகள் மற்றும் அவர்களுடன் வருபவர்களின் தேவைகள் உடனுக்குடன் பூர்த்தி செய்யப்படுவது உறுதி செய்யப்படும்.

அரசு மருத்துவமனைகளில் பெரும் சவாலாக விளங்கும் வெளிநோயாளி பிரிவின் காத்திருப்பு நேரத்தைக் குறைக்க, தனியார் தொழில்நுட்ப நிறுவனத்துடன் இணைந்து பிரத்யேக மொபைல் போன் செயலி ஒன்று உருவாக்கப்பட உள்ளது. இதன் மூலம் பொதுமக்கள் தங்கள் அடையாளச் சான்றுகளைப் பயன்படுத்தி, தினசரி காலை 5 மணி முதல் மதியம் 2 மணி வரை எளிதாக முன்பதிவு செய்து கொள்ளலாம். முன்பதிவு செய்த நோயாளிகளுக்குக் குறிப்பிட்ட நேரம் ஒதுக்கப்படுவதால், அவர்கள் நீண்ட வரிசையில் நிற்காமல் நேரடியாக மருத்துவரைச் சந்திக்க முடியும். முதற்கட்டமாக அனைத்து அரசு மருத்துவக் கல்லூரி மருத்துவமனைகளிலும் இந்த டோக்கன் முறை விரைவில் அறிமுகப்படுத்தப்படவுள்ளது.

மேலும், அரசு மருத்துவமனைகளில் காலியாக உள்ள பணியிடங்களில் புதிய நிபுணத்துவ மருத்துவர்கள் மற்றும் செவிலியர்களை விரைந்து நியமிக்க அரசு நடவடிக்கை எடுத்து வருகிறது. மின்தடை போன்ற அவசரக் காலப் பிரச்சினைகளை எதிர்கொள்ள மக்கள் நல்வாழ்வுத் துறை, பொதுப்பணித் துறை மற்றும் தமிழ்நாடு மின்வாரியம் ஆகியவற்றை உள்ளடக்கிய ‘ஒருங்கிணைப்புக் குழு’ ஒன்றும் அமைக்கப்பட உள்ளது. ஏழை, எளிய மக்களுக்குத் தரமான மற்றும் விரைவான மருத்துவ சேவை கிடைப்பதை உறுதி செய்யும் தமிழக அரசின் இந்த அதிநவீன முயற்சிகள் மக்கள் மத்தியில் பெரும் வரவேற்பைப் பெற்றுள்ளன.