“”கடைசி நேரத்தில் ஆட்டத்தை களைத்த விஜய்”…. மொத்தமாக அவுட் ஆன எடப்பாடி…. இதோ பரபரப்பு ரிப்போர்ட்…!

தமிழக சட்டசபை தேர்தல் முடிவுகள் வரும் மே 4-ஆம் தேதி வெளியாக உள்ள நிலையில், பல்வேறு நிறுவனங்கள் தங்களது தேர்தலுக்குப் பிந்தைய கருத்துக்கணிப்புகளை வெளியிட்டு வருகின்றன. அந்த வகையில், தற்போது வெளியாகியுள்ள ‘டுடேஸ் சாணக்யா’ (Today’s Chanakya) நிறுவனத்தின் கருத்துக்கணிப்பு தமிழக அரசியலில் பெரும் பரபரப்பை ஏற்படுத்தியுள்ளது. இந்த கணிப்பின்படி, தமிழகத்தில் மீண்டும் திமுக தலைமையிலான கூட்டணியே ஆட்சியைத் தக்கவைக்கும் என்று தெரிவிக்கப்பட்டுள்ளது. மொத்தமுள்ள 234 தொகுதிகளில், திமுக கூட்டணி 114 முதல் 136 இடங்கள் வரை பிடித்து பெரும்பான்மையுடன் வெற்றி பெற வாய்ப்புள்ளதாகக் கூறப்பட்டுள்ளது.

இந்தக் கருத்துக்கணிப்பில் அனைவரையும் வியப்பில் ஆழ்த்தியிருப்பது நடிகர் விஜய்யின் தமிழக வெற்றிக் கழகம் (தவெக) பெற்றுள்ள இடங்கள்தான். அதிமுகவை பின்னுக்குத் தள்ளிவிட்டு, தவெக 52 முதல் 74 தொகுதிகள் வரை கைப்பற்றக்கூடும் என்று கணிக்கப்பட்டுள்ளது. பிரதான எதிர்க்கட்சியான அதிமுக கூட்டணி 34 முதல் 56 இடங்களுக்குள் சுருங்கும் என்றும், மற்ற கட்சிகள் 0 முதல் 2 இடங்களை மட்டுமே பெறும் என்றும் தெரிவிக்கப்பட்டுள்ளது. இதன் மூலம், தமிழக அரசியலில் ஒரு வலுவான மூன்றாவது சக்தியாக அல்லது பிரதான எதிர்க்கட்சியாக விஜய் உருவெடுக்க வாய்ப்புள்ளதை இந்தக் கணிப்பு சுட்டிக்காட்டுகிறது.

வாக்கு சதவீதத்தைப் பொறுத்தவரை, திமுக கூட்டணி 39 சதவீத வாக்குகளைப் பெற்று முதலிடத்தில் இருக்கும் எனத் தெரிகிறது. கவனிக்கத்தக்க விஷயமாக, தவெக 30 சதவீத வாக்குகளைப் பெற்று அதிமுகவை (27 சதவீதம்) முந்தியுள்ளது. சமூக ரீதியிலான வாக்குகளைப் பகுப்பாய்வு செய்கையில், இஸ்லாமியர்களின் வாக்குகள் 64 சதவீதமும், கிறிஸ்தவர்களின் வாக்குகள் 49 சதவீதமும் திமுக கூட்டணிக்கே சாதகமாக இருப்பதாகத் தெரிவிக்கப்பட்டுள்ளது. மேலும், பிற்படுத்தப்பட்டோர் மற்றும் மிகவும் பிற்படுத்தப்பட்டோர் வாக்குகளிலும் கணிசமான பகுதியை திமுகவே அறுவடை செய்துள்ளதாகக் கூறப்படுகிறது.

ஆட்சியைப் பிடிக்க 118 இடங்கள் தேவை என்கிற நிலையில், திமுக கூட்டணி குறைந்தபட்சம் 114 முதல் அதிகபட்சம் 136 இடங்கள் வரை வெல்லும் வாய்ப்பு இருப்பதால், மீண்டும் மு.க.ஸ்டாலின் தலைமையிலான அரசே அமைய அதிக வாய்ப்புகள் உள்ளன. இருப்பினும், அதிமுகவைப் பின்னுக்குத் தள்ளி 30 சதவீத வாக்கு வங்கி மற்றும் சுமார் 70 இடங்கள் வரை தவெக பிடிக்கும் என்று டுடேஸ் சாணக்யா கணித்துள்ளது, தற்போதைய அரசியல் களத்தில் மிகப்பெரிய அதிர்வலைகளை உருவாக்கியுள்ளது. மே 4-ஆம் தேதி வெளியாகும் அதிகாரப்பூர்வ முடிவுகள் இந்தக் கணிப்புகளை உறுதிப்படுத்துமா என்பதைப் பொறுத்திருந்துதான் பார்க்க வேண்டும்.