மகளிர் உரிமைத்தொகை ரூ.5,000… புதிதாக இணைக்கப்படும் பயனாளிகள்….. தமிழக அரசு புதிய அதிரடி….!

தமிழக அரசின் ‘கலைஞர் மகளிர் உரிமைத் தொகை’ திட்டத்தின் கீழ் தகுதியுள்ள சுமார் 1.31 கோடி பயனாளிகளுக்கு, பிப்ரவரி மாதத் தவணையுடன் சேர்த்து மொத்தம் 5,000 ரூபாய் ஒரே தவணையாக அவர்களது வங்கி கணக்குகளில் வரவு வைக்கப்பட்டுள்ளது. இந்த 5,000 ரூபாயில் பிப்ரவரி மாதத்திற்கான 1,000 ரூபாய், தேர்தல் நடத்தை விதிகள் அமலுக்கு வரக்கூடும் என்பதால் முன்முயற்சியாக மார்ச் மற்றும் ஏப்ரல் மாதங்களுக்கான 2,000 ரூபாய், மற்றும் கோடைக்காலச் சிறப்புத் தொகையாக 2,000 ரூபாய் ஆகியவை அடங்கும்.

இந்த அதிரடி நிதி வரவு மற்றும் அடுத்த முறை திமுக ஆட்சிக்கு வந்தால் இந்த உரிமைத் தொகை 2,000 ரூபாயாக உயர்த்தப்படும் என்ற முதலமைச்சரின் வாக்குறுதி, தமிழகப் பெண்களிடையே பெரும் வரவேற்பைப் பெற்றுள்ளது. இதனால், இதுவரை இத்திட்டத்தின் கீழ் பயன்பெறாத லட்சக்கணக்கான பெண்கள், தங்களையும் இத்திட்டத்தில் இணைத்துக்கொள்ள ஆர்வம் காட்டி வருகின்றனர். இதன் விளைவாக, தமிழகம் முழுவதும் உள்ள வட்டாட்சியர் அலுவலகங்கள் மற்றும் இ-சேவை மையங்களில் புதிய விண்ணப்பங்களைச் சமர்ப்பிக்க பெண்கள் பெருமளவில் திரண்டு வருகின்றனர்.

தற்போது நிலவி வரும் இந்த கூட்ட நெரிசலைக் கருத்தில் கொண்டு, புதிய விண்ணப்பங்கள் குறித்து அதிகாரிகள் விளக்கம் அளித்துள்ளனர். தற்போதைய நிலையில் புதிய விண்ணப்பங்களை ஏற்றுக்கொள்வது தற்காலிகமாக நிறுத்தப்பட்டுள்ளதாகவும், ஏற்கனவே விண்ணப்பித்து நிராகரிக்கப்பட்டவர்கள் மட்டுமே மேல்முறையீடு செய்ய அனுமதிக்கப்படுவதாகவும் தெரிவிக்கப்பட்டுள்ளது. புதிய பயனாளிகளைச் சேர்ப்பதற்கான அதிகாரப்பூர்வ முகாம்கள் அல்லது அறிவிப்புகள் அரசு தரப்பில் இருந்து வெளியான பின்னரே புதிய விண்ணப்பங்கள் ஏற்றுக்கொள்ளப்படும் என தெளிவுபடுத்தப்பட்டுள்ளது.

பெண்கள் தங்கள் விண்ணப்பத்தின் நிலையை kmut.tn.gov.in என்ற இணையதளம் வாயிலாகச் சரிபார்த்துக் கொள்ளலாம். தகுதியிருந்தும் விண்ணப்பம் நிராகரிக்கப்பட்டிருந்தால், அதற்கான காரணத்தை அறிந்து 30 நாட்களுக்குள் வருவாய் கோட்டாட்சியரிடம் மேல்முறையீடு செய்யலாம். அரசுப் பணத்தை இடைத்தரகர்களிடம் கொடுத்து ஏமாற வேண்டாம் என்றும், முறையான அறிவிப்பு வரும் வரை காத்திருக்குமாறும் பொதுமக்களுக்கு அறிவுறுத்தப்பட்டுள்ளது.