ரேஷன் அட்டைதாரர்களே..! மூன்று மாத ரேஷன் பொருட்கள் ஒரே தவணையில்.. மத்திய அரசின் அதிரடி அறிவிப்பு..!!

மத்திய அரசு வரும் ஏப்ரல் மாதம் முதல், ரேஷன் அட்டைதாரர்களுக்கு ஏப்ரல், மே மற்றும் ஜூன் ஆகிய மூன்று மாதங்களுக்கான உணவு தானியங்களை ஒரே தவணையில் வழங்க முடிவு செய்துள்ளது. பொதுவாக மாதந்தோறும் பிரித்து வழங்கப்படும் இந்த நடைமுறை, தற்போது கோடை காலத்தை முன்னிட்டு மாற்றியமைக்கப்பட்டுள்ளது. இதன் மூலம் பொது விநியோகத் திட்டத்தின் கீழ் பயன்பெறும் மக்கள், வரும் மூன்று மாதங்களுக்குத் தேவையான அத்தியாவசியப் பொருட்களை முன்கூட்டியே பெற்றுக்கொள்ள முடியும்.

இந்த அதிரடி மாற்றத்திற்கு முக்கியக் காரணமாக புதிய கோதுமை கொள்முதல் அமைந்துள்ளது. விளைச்சல் காலம் என்பதால், விவசாயிகளிடமிருந்து கொள்முதல் செய்யப்படும் புதிய கோதுமையைச் சேமித்து வைக்க இந்திய உணவுக் கழகக் (FCI) கிடங்குகளில் போதிய இடவசதி தேவைப்படுகிறது. தற்போது கிடங்குகளில் உள்ள இருப்பை விரைவாக விநியோகிப்பதன் மூலம், புதிய தானியங்களை பாதுகாப்பாகச் சேமிப்பதற்கான இட நெருக்கடி தவிர்க்கப்படும் என அரசு தரப்பில் விளக்கமளிக்கப்பட்டுள்ளது.

தற்போது நாடு முழுவதும் 99% ரேஷன் அட்டைகள் ஆதாருடன் இணைக்கப்பட்டுள்ளதால், முறைகேடுகள் இன்றி இந்த விநியோகம் வெளிப்படையாக நடைபெறும் என உறுதி அளிக்கப்பட்டுள்ளது. இந்த முறை அமல்படுத்தப்படுவதால், பொதுமக்கள் ஒவ்வொரு மாதமும் ரேஷன் கடைக்குச் சென்று வரிசையில் காத்திருக்க வேண்டிய அவசியம் இருக்காது. இது மக்களின் அலைச்சலைப் பெருமளவு குறைப்பதுடன், குடும்பங்களுக்குத் தேவையான உணவுப் பாதுகாப்பை முன்கூட்டியே உறுதி செய்யவும் உதவும்.