“ஐந்தே மாசத்துல எஸ்கேப்”….. திருப்பரங்குன்றம் கோயில் அறங்காவலர்கள் கூண்டோடு ராஜினாமா….. காலையிலேயே பரபரப்பு….!

திருப்பரங்குன்றம் சுப்பிரமணிய சுவாமி திருக்கோயிலின் அறங்காவலர் குழுத் தலைவர் சத்யப்பிரியா பாலாஜி மற்றும் அதன் உறுப்பினர்கள் திடீரெனத் தமது பதவிகளை ராஜினாமா செய்திருப்பது ஆன்மீக அன்பர்களிடையேயும் கோயில் வட்டாரத்திலும் பெரும் அதிர்வலைகளை ஏற்படுத்தியுள்ளது. முருகப்பெருமானின் அறுபடை வீடுகளில் முதல் படைவீடாகத் திகழும் இத்திருக்கோயிலில், கடந்த பிப்ரவரி மாதம்தான் இக்குழுவினர் முறைப்படி பொறுப்பேற்றுக் கொண்டனர். இவர்களது பதவிக்காலம் 2028-ஆம் ஆண்டு வரை நீட்டிக்கப்பட்டிருந்த நிலையில், பொறுப்பேற்ற ஐந்தே மாதங்களில் இத்தகைய விடைபெறல் நிகழ்ந்துள்ளது.

நேற்று திருக்கோயிலுக்குச் சென்ற அறங்காவலர் குழுத் தலைவர் சத்யப்பிரியா பாலாஜி, சுவாமி தரிசனம் செய்த கையோடு தனது ராஜினாமா கடிதத்தை கோயில் அதிகாரிகளிடம் வழங்கினார். அவரைத் தொடர்ந்து குழுவில் இடம் பெற்றிருந்த சண்முகசுந்தரம், ராமையா ஆகிய உறுப்பினர்களும் தங்களது பதவிகளைத் துறந்தனர். வெளியூர் சென்றுள்ள மற்றொரு உறுப்பினரான பொம்மத்தேவனும் விரைவில் தனது விலகல் கடிதத்தை வழங்குவார் என எதிர்பார்க்கப்படுகிறது. இதனால் அறங்காவலர் குழு ஒட்டுமொத்தமாகவே தனது பொறுப்பில் இருந்து விலகும் சூழல் உருவாகியுள்ளது.

இந்தத் திடீர் ராஜினாமாவுக்கான தெளிவான காரணங்கள் எதுவும் இதுவரை அதிகாரப்பூர்வமாக அறிவிக்கப்படவில்லை. இருப்பினும், அண்மைக்காலமாகப் பழனி தண்டாயுதபாணி சுவாமி கோயில் நில முறைகேடு தொடர்பான செய்திகள் மாநிலம் முழுவதும் பெரும் விவாதத்தைக் கிளப்பியுள்ள சூழலில், திருப்பரங்குன்றத்திலும் அறங்காவலர்கள் கூண்டோடு விலகியிருப்பது பல்வேறு ஊகங்களுக்கும் கேள்விகளுக்கும் வழிவகுத்துள்ளது.

எந்தவித முன்னறிவிப்பும் இன்றி, பதவிக்காலம் முடிவதற்கு முன்பே அறங்காவலர்கள் அனைவரும் வரிசையாக விலகியிருப்பது பக்தர்களிடையே குழப்பத்தையும் பரப்பரப்பையும் ஏற்படுத்தியுள்ளது. கோயில் நிர்வாகத்தில் என்ன நடக்கிறது என்பதைத் தெளிவுபடுத்தி, திருக்கோயில் நடைமுறைகள் சீராகத் தொடர இந்து சமய அறநிலையத்துறை உடனடியாக நடவடிக்கை எடுக்க வேண்டும் என்பதே ஆன்மீகப் பெரியோர்களின் எதிர்பார்ப்பாக உள்ளது.