பணக்காரி வேஷம் கலைந்தது..! 118 சவரன் பறிகொடுத்த ரீல்ஸ் மதுமிதா… இப்போ அவரே திருட்டு வழக்கில் சிக்கினாரா?!… தலைமறைவான பகீர் பின்னணி…!!

நாகர்கோவில் பகுதியைச் சேர்ந்த இன்ஸ்டாகிராம் ரீல்ஸ் பிரபலமான மதுமிதா, சமீபத்தில் தனது வீட்டில் நடந்த பெரும் கொள்ளை சம்பவத்தால் மக்களிடையே பேசுபொருளானார். பண மழையில் நனைவது போன்றும், அதிகப்படியான தங்க நகைகளை அணிந்து கொண்டும் சமூக வலைத்தளங்களில் வலம் வந்த இவரைத் தேடி தற்போது ஒரு புதிய திருட்டுச் சிக்கல் வந்துள்ளது. தனக்கு ஏற்பட்ட 118 சவரன் கொள்ளை சம்பவத்திற்குப் பிறகும் தொடர்ந்து உற்சாகமாக வீடியோக்களை வெளியிட்டு வந்த மதுமிதா மீது, தற்போது நகை திருட்டு மற்றும் மோசடி வழக்குகள் பதிவு செய்யப்பட்டுள்ளதால் அவர் தலைமறைவாகியுள்ளார்.

நெல்லை கே.டி.சி நகரைச் சேர்ந்த ஒருவரது வீட்டில் 5 சவரன் தங்க நகையை மதுமிதா திருடியதாக ராஜாக்கமங்கலம் காவல் நிலையத்தில் சமீபத்தில் புகார் அளிக்கப்பட்டது. இதன் அடிப்படையில் காவல்துறையினர் அவர் மீது திருட்டு வழக்குப் பதிவு செய்துள்ளனர். ஏற்கனவே தனது ஆடம்பரத்தை சமூக வலைத்தளங்கள் வாயிலாக வெளிச்சம் போட்டுக் காட்டி திருடர்களின் கவனத்தை ஈர்த்து சொந்த நகைகளைப் பறிகொடுத்த மதுமிதா, தற்போது தன் மீதே திருட்டுப் புகார் சுமத்தப்பட்டதால் காவல்துறையினரின் கைது நடவடிக்கைக்கு அஞ்சி தலைமறைவாகி இருப்பது பலரையும் அதிர்ச்சியில் ஆழ்த்தியுள்ளது.

இந்த திருட்டு சம்பவம் நெல்லை காவல் எல்லைக்குட்பட்ட பகுதியில் நடந்ததாகக் கூறப்படுவதால், வழக்கின் அடுத்தகட்ட விசாரணையை திருநெல்வேலி மாவட்ட காவல்துறைக்கு மாற்றும் பணிகள் தீவிரமாக நடைபெற்று வருகின்றன. மேலும், அவர் வருமானம் ஈட்டிய வழிகள் குறித்தும், வேறு ஏதேனும் பண மோசடிகளில் அவருக்குத் தொடர்புள்ளதா என்பது குறித்தும் அதிகாரிகள் விசாரணையை முடுக்கிவிட்டுள்ளனர். இன்ஸ்டாகிராமில் தனது செல்வச் செழிப்பைக் காட்டி பிரபலமான மதுமிதாவை, தற்பொழுது காவல்துறையினர் வலைவீசித் தேடி வருகின்றனர்.