இனி கரண்ட் பில் கவலையே இல்லை… வீடுகளுக்குச் சூரிய ஒளி மின்சாரம் அமைக்கும் தமிழ்நாடு அரசின் சூப்பர் திட்டம்… விண்ணப்பிப்பது எப்படி…? முழு விவரம் இதோ…!!

வீட்டு மின் கட்டணத்தைக் கணிசமாகக் குறைக்கும் நோக்கில், தமிழ்நாடு மின் பகிர்மான கழகத்தின் சார்பில் ‘பிரதம மந்திரி சூரிய வீடு இலவச மின்சாரத் திட்டம்’ குறித்த விழிப்புணர்வு முகாம் திண்டுக்கல் மாவட்ட ஆட்சியர் துர்காமூர்த்தி தலைமையில் நடைபெற்றது. இத்திட்டத்தின் கீழ் வீடுகளின் கூரைகளில் சோலார் பேனல்கள் அமைப்பதற்கு அரசால் வங்கி கடன் வசதி மற்றும் மத்திய அரசின் நேரடி மானியமும் வழங்கப்படுகிறது. இதன்படி 1 கிலோ வாட்டுக்கு ரூ.30,000, 2 கிலோ வாட்டுக்கு ரூ.60,000 மற்றும் 3 கிலோ வாட் அல்லது அதற்கு மேற்பட்ட அளவிற்கு ரூ.78,000 வரை மானியம் அளிக்கப்படுகிறது. சோலார் பேனல் அமைக்கும் பணிகள் முடிவடைந்த 7 முதல் 30 நாட்களுக்குள் பயனாளிகளின் வங்கி கணக்கிலேயே இந்த மானியத் தொகை நேரடியாகச் செலுத்தப்பட்டுவிடும். 1 கிலோ வாட் திறன் கொண்ட சோலார் அமைப்பதன் மூலம் நாளொன்றுக்கு 4 முதல் 5 யூனிட்கள் வரை மின்சாரம் உற்பத்தி செய்து, முதலீட்டை விரைவாக மீட்க முடியும்.

இத்திட்டத்தின் கீழ் திண்டுக்கல் மின்பகிர்மான வட்டத்தில் மொத்தம் 4,113 வீடுகளுக்கு இலக்கு நிர்ணயிக்கப்பட்டு, இதுவரை 1,200 வீடுகளில் சோலார் இணைப்புகள் வெற்றிகரமாக வழங்கப்பட்டுள்ளன. 500 யூனிட்டுகளுக்கு மேல் மின்சாரம் பயன்படுத்தும் நுகர்வோர்களைக் கண்டறிந்து அவர்களுக்குத் துண்டுப் பிரசுரங்கள் மூலம் விழிப்புணர்வு ஏற்படுத்தப்பட்டு வருகிறது. இத்திட்டத்தில் சேர்ந்து பயன்பெற விரும்புபவர்கள் தங்களது சமீபத்திய மின் கட்டண இரசீதை மட்டும் பயன்படுத்தி, pmsuryaghar.gov.in அல்லது www.solarrooftop.gov.in ஆகிய இணையதளங்கள் வாயிலாகவோ அல்லது “PM-suryaghar” என்ற மொபைல் செயலி மூலமாகவோ மிக எளிதாக விண்ணப்பிக்கலாம் என்று மாவட்ட நிர்வாகத்தின் சார்பில் தெரிவிக்கப்பட்டுள்ளது.