“அப்படியே உறைஞ்சு போயிட்டேன்…!” – 3 போட்டிகளில் டக் அவுட்… தோனி கேட்ட ‘அந்த’ ஒரு கேள்வி… சஞ்சு சாம்சன் நெகிழ்ச்சி…!!

இங்கிலாந்துக்கு எதிரான டி20 தொடரில் தொடர்ந்து சொதப்பியதால் இந்திய அணியில் பெஞ்ச் செய்யப்பட்டுள்ள சஞ்சு சாம்சன், அண்மையில் சென்னை சூப்பர் கிங்ஸ் அணியில் தனக்கு கிடைத்த அனுபவங்கள் குறித்துப் பகிர்ந்துள்ளார். ராஜஸ்தான் ராயல்ஸ் அணியில் நீண்ட காலம் விளையாடிய பிறகு, அந்த அணி தளம் தனக்கு அப்பால் நகரத் தயாராகிவிட்டதை உணர்ந்து அங்கிருந்து வெளியேறியதாகக் குறிப்பிட்டுள்ளார். தனக்கு 2-3 வாய்ப்புகள் இருந்தபோதிலும், எம்.எஸ்.தோனியின் மீதான ஈர்ப்பு காரணமாகவே சிஎஸ்கே அணியைத் தேர்ந்தெடுத்ததாக சஞ்சு சாம்சன் தெரிவித்துள்ளார்.

சிஎஸ்கே அணியில் இணைந்த ஆரம்பத்தில், முதல் 3 போட்டிகளில் சஞ்சு சாம்சன் ரன் ஏதும் எடுக்காமல் மோசமாக ஆட்டமிழந்தார். இருப்பினும், அணியின் பயிற்சியாளர் ஸ்டீபன் பிளெமிங், கேப்டன் ருதுராஜ் கெய்க்வாட் மற்றும் தோனி ஆகியோரது அணுகுமுறையிலும், அவர்கள் காட்டிய அன்பிலும் 1% கூட மாற்றம் இல்லை என்று நெகிழ்ச்சியோடு கூறியுள்ளார். இந்த மோசமான ஃபார்மிற்குப் பிறகும் சிஎஸ்கே நிர்வாகம் மற்றும் சீனியர் வீரர்கள் தனக்கு முழு ஆதரவாக நின்றதை அவர் சுட்டிக்காட்டியுள்ளார்.

குறிப்பாக, முதல் 3 போட்டிகளின் தோல்விகளுக்குப் பிறகு தோனி தன்னிடம் வந்து, ‘நீ பாதுகாப்பாக உணர்கிறாயா?’ என்று கேட்டதாக சஞ்சு சாம்சன் நினைவு கூர்ந்துள்ளார். அதற்கு சஞ்சு, ‘நான் பாதுகாப்பாக உணர்கிறேன்.. ஆனால்…’ என இழுத்தபோது, ‘அந்த ஆனால் என்ற வார்த்தைக்குள் போகாதே’ என்று தோனி அறிவுறுத்தியுள்ளார். இந்த சிறிய வார்த்தை தன் வாழ்க்கையின் மிகப்பெரிய பாடமாக அமைந்தது என்று கூறிய சஞ்சு சாம்சன், காயத்தால் இந்த சீசனில் விளையாடாத தோனியுடன் இணைந்து விளையாடும் தனது கனவு விரைவில் நிறைவேறும் என்றும் நம்பிக்கை தெரிவித்துள்ளார்.