காலையிலேயே இபிஎஸ்-க்கு விழுந்த பலத்த அடி… கூண்டோடு திமுகவில் இணைந்த முக்கிய புள்ளி.. செந்தில் பாலாஜியின் ஆட்டம் ஆரம்பம்…!

கரூர் மாவட்ட அரசியலில் பெரும் பரபரப்பை ஏற்படுத்தும் விதமாக, அதிமுகவின் முக்கிய நிர்வாகியும் முன்னாள் மாவட்ட கவுன்சிலருமான MDA துரைமுருகன், தனது ஆதரவாளர்கள் 100-க்கும் மேற்பட்டோருடன் திமுகவில் இணைந்துள்ளார். அமைச்சர் வி. செந்தில் பாலாஜி முன்னிலையில் நடைபெற்ற இந்த இணைவு விழா, கரூர் அதிமுக வட்டாரத்தில் அதிர்ச்சியை ஏற்படுத்தியுள்ளது. கடந்த சில காலமாகவே கட்சித் தலைமையுடன் ஏற்பட்ட அதிருப்தி காரணமாக அவர் இந்த முடிவை எடுத்துள்ளதாகக் கூறப்படுகிறது. கொங்கு மண்டலத்தில் தடம் பதிக்க திமுக தீவிரம் காட்டி வரும் வேளையில், அதிமுகவின் கோட்டையாகக் கருதப்படும் பகுதிகளில் இருந்து முக்கிய நிர்வாகிகள் வெளியேறுவது அரசியல் களத்தில் முக்கியத்துவத்தைப் பெற்றுள்ளது.

கட்சி மாறியதுடன் நில்லாமல், அடுத்த சில நாட்களில் முன்னாள் அமைச்சர் எம்.ஆர். விஜயபாஸ்கருக்கு வலுவான பதிலடி கொடுக்கும் வகையில் பிரம்மாண்ட இணைவு விழா ஒன்றையும் நடத்த MDA துரைமுருகன் திட்டமிட்டுள்ளார். இந்த விழாவில் விஜயபாஸ்கரின் தீவிர ஆதரவாளர்கள் பலரை திமுகவில் இணைக்கப் போவதாக அவர் சவால் விடுத்துள்ளார். தற்போது கொங்கு மண்டலம் முழுவதும் அதிமுக மற்றும் திமுக இடையே கடும் போட்டி நிலவி வரும் சூழலில், கட்சித் தாவல்கள் தொடர்கதையாகி வருகின்றன. இந்த நகர்வுகள் வரவிருக்கும் தேர்தல்களில் கரூர் மாவட்டத்தின் அரசியல் செல்வாக்கை தீர்மானிப்பதில் பெரும் பங்கு வகிக்கும் என எதிர்பார்க்கப்படுகிறது.