ஒரு நாளைக்கு ரூ. 22.63 லட்சம் சம்பளமா?.. யார் அந்த “லக்கி மேன்”?.. ஐடி உலகையே அதிரவைத்த இன்போசிஸ் ஊழியர்…!!

இன்போசிஸ் நிறுவனத்தின் சிஇஓ சலில் பரேக் 2025-26 நிதியாண்டில் 2.5 சதவீத உயர்வுடன் மொத்தம் 82.6 கோடி ரூபாயை ஊதியமாகப் பெற்றுள்ளார். இதில் அவரது நிலையான அடிப்படைச் சம்பளம் 8.5 கோடி ரூபாயாகவும், செயல்திறன் அடிப்படையிலான Variable Pay 23.35 கோடி ரூபாயாகவும், நிறுவனப் பங்குகளை பணமாக மாற்றியதன் மூலம் கிடைத்த தொகை 50.75 கோடி ரூபாயாகவும் உள்ளது. இந்நிறுவனம் தனது 3 லட்சத்திற்கும் அதிகமான ஊழியர்களுக்கான சம்பள உயர்வு குறித்த காலக்கெடுவை அறிவிக்காமல் மௌனம் காக்கும் வேளையில், சிஇஓ-வின் இந்த மெகா சம்பள விவரம் ஐடி ஊழியர்களிடையே பெரும் விவாதத்தை ஏற்படுத்தியுள்ளது.

இந்த வருடாந்திர அறிக்கையின்படி, சலில் பரேக்கின் ஒட்டுமொத்த ஊதியம் இன்போசிஸ் நிறுவனத்தின் ஒரு சராசரி ஊழியரின் நடுத்தர ஊதியத்தை (Median Employee Remuneration) விட சுமார் 742 மடங்கு அதிகமாகும்; பங்குகள் மூலமான லாபத்தைத் தவிர்த்தாலும் கூட இது 289 மடங்கு அதிகமாகவே நீடிக்கிறது. சலில் பரேக்கின் இந்த 82.6 கோடி ரூபாய் வருமானத்தை நாட்களின் அடிப்படையில் கணக்கிட்டுப் பார்த்தால், அவர் ஒரு நாளுக்கு 22.63 லட்சம் ரூபாயும், ஒரு நிமிடத்திற்கு 1,571 ரூபாயும் சம்பாதிப்பது குறிப்பிடத்தக்கது.

இந்தியாவின் பிற முன்னணி ஐடி நிறுவனங்களின் சிஇஓ-க்களின் சம்பளத்துடன் ஒப்பிடுகையில், டிசிஎஸ் அமைப்பின் சிஇஓ கே.கிருதிவாசன் ஆண்டுக்கு 28 கோடி ரூபாயும், விப்ரோ நிறுவன சிஇஓ ஸ்ரீநிவாஸ் பல்லியா 53.6 கோடி ரூபாயும் பெறுகின்றனர். இவர்களை விட மிக உச்சமாக, எச்சிஎல் டெக் (HCLTech) நிறுவனத்தின் சிஇஓ சி. விஜயகுமார் 94.6 கோடி ரூபாய் சம்பளம் பெற்று ஒட்டுமொத்த இந்திய ஐடி துறையிலேயே மிக அதிக சம்பளம் வாங்கும் நபராக முதலிடத்தில் நீடிக்கிறார்.