மக்களே உஷார்!… காவலாளி இல்லாத சில நிமிடங்கள்… நொடியில் பறிபோன தங்கம்… அபார்ட்மெண்டில் நடந்த பகீர் திருட்டு…!!

காந்திவிலி பகுதியில் உள்ள ஒரு அடுக்குமாடி குடியிருப்பில் பட்டப்பகலில் துணிகரத் திருட்டு சம்பவம் அரங்கேறியுள்ளது. உணவு அல்லது பார்சல் டெலிவரி செய்யும் ஊழியர் போல ஆடை அணிந்து உள்ளே நுழைந்த அடையாளம் தெரியாத நபர், இரண்டாவது மாடிக்குச் சென்றுள்ளார். அங்கு வசித்து வரும் முதிய பெண் ஒருவர் தனது வீட்டின் பூட்டைத் திறக்க முற்பட்ட தருணத்தில், கண் இமைக்கும் நேரத்தில் அவரது கழுத்தில் இருந்த தங்கச் சங்கிலியைப் பலவந்தமாகப் பறித்துக்கொண்டு அந்த மர்ம நபர் மின்னல் வேகத்தில் தப்பி ஓடிவிட்டார்.

பாதுகாப்புக் காவலர் மற்றொரு நபரின் வாகனத்தை நிறுத்துவதற்காகத் தற்காலிகமாக நுழைவு வாயிலை விட்டுச் சென்றிருந்த சூழ்நிலையைத் தனக்குச் சாதகமாகப் பயன்படுத்தி அந்த மர்ம நபர் வளாகத்திற்குள் புகுந்துள்ளார். இச்சம்பவம் குறித்து பாதிக்கப்பட்ட பெண் அளித்த புகாரின் பேரில், பாரதிய நியாய சன்ஹிதா சட்டம் பிரிவு 309(4)-ன் கீழ் வழக்குப் பதிவு செய்துள்ள காவல்துறையினர், அப்பகுதியில் பொருத்தப்பட்டுள்ள கண்காணிப்பு கேமராப் பதிவுகளைத் தீவிரமாக ஆய்வு செய்து தப்பியோடிய நபரைத் தேடி வருகின்றனர்.