ஆன்லைனில் புகார் கொடுத்தும் பலனில்லை..! அடிப்படை உரிமைக்காக வீதிக்கு வந்த பள்ளிச் சிறுவர்கள்… நெஞ்சை உலுக்கும் பிஞ்சு மாணவர்களின் போராட்டம்…!!

உத்தரப் பிரதேச மாநிலத்தின் யமுனை நதிப்பகுதியில் உள்ள பத்புர்வா சமுஹி கிராமத்து பள்ளி மாணவர்கள், தங்களுக்குப் புதிய பள்ளி வளாகம் அமைத்துத் தரக்கோரி வகுப்புகளைப் புறக்கணித்து நடத்திய அறவழிப் போராட்டம் பலரையும் திரும்பிப் பார்க்க வைத்துள்ளது. நீண்டகாலமாகக் கிடப்பில் போடப்பட்டுள்ள கட்டடப் பணிகளை உடனே துவங்க வேண்டும் என வலியுறுத்தி, இந்த ‘ஜென் ஆல்ஃபா’ தலைமுறைச் சிறுவர்கள் பள்ளியின் வெளிப்புறத்தில் அமர்ந்து தர்ணாவில் ஈடுபட்டனர். இது தொடர்பாக இணையவழியில் பலமுறை புகாரளித்தும் எவ்விதப் பலனும் கிடைக்காததால் அதிருப்தியடைந்த இந்த குழந்தைகள், கல்வித்துறை அதிகாரிகள் நேரில் வந்து முறையான வாக்குறுதி அளித்தால் மட்டுமே போராட்டத்தைக் கைவிடுவோம் எனத் திட்டவட்டமாக அறிவித்தனர்.

மாணவர்களை வகுப்பறைக்குத் திரும்பச் செய்யப் பள்ளித் தலைமை ஆசிரியை பிரியங்கா திவாரி மேற்கொண்ட சமாதான முயற்சிகள் அனைத்தும் தோல்வியிலேயே முடிந்தன. கைகளில் தேசியக் கொடியைத் தாங்கியபடி, எவ்வித வன்முறையுமின்றி நூற்றுக்கணக்கான மாணவர்கள் ஒன்றுகூடி அமைதியாகத் தங்களின் உரிமைகளுக்காகக் குரலெழுப்பும் வீடியோக்கள் வெளியாகி நெகிழ்ச்சியை ஏற்படுத்தியுள்ளன. தலைநகர் டெல்லியில் ‘ஜென் ஸீ’ இளமுறையினர் தங்களின் கோரிக்கைகளுக்காகத் தொடர் வேலைநிறுத்தங்களை முன்னெடுத்து வரும் இக்காலகட்டத்தில், உத்தரப் பிரதேசத்தின் குக்கிராமம் ஒன்றில் மிகச் சிறிய வயதைக் கொண்ட ‘ஜென் ஆல்ஃபா’ சிறுவர்கள் தங்களின் அடிப்படைத் தேவையான பள்ளிக் கட்டடத்திற்காக வீதிக்கு வந்து போராடத் துவங்கியிருப்பது சமூகத்தில் ஒரு மிகப்பெரிய விழிப்புணர்வைக் காட்டுகிறது.