20 லட்சம் பேர் இணையும் ‘வி தி லீடர்ஸ்’…. அண்ணாமலையின் புதிய அவதாரம்….. பொள்ளாச்சியில் இன்று அரங்கேறும் மாபெரும் அரசியல் திருப்பம்….!

தமிழக பாஜகவின் முன்னாள் தலைவரான அண்ணாமலை, அக்கட்சியிலிருந்து அதிகாரப்பூர்வமாக விலகிய பிறகு தொடங்கியுள்ள ‘வி தி லீடர்ஸ்’ (We the Leaders) அமைப்பின் முதலாவது விழிப்புணர்வு மாநாடு இன்று பொள்ளாச்சியில் பிரம்மாண்டமாக நடைபெறுகிறது. கடந்த 2021 முதல் 2025 வரை தமிழக பாஜக தலைவராக அதிரடி அரசியல் நடத்திக் கவனம் ஈர்த்த அண்ணாமலை, அண்மையில் பதவியிலிருந்து நீக்கப்பட்டதைத் தொடர்ந்து, டெல்லியில் மத்திய அமைச்சர் அமித்ஷாவை நேரில் சந்தித்துத் தனது விலகல் முடிவை அறிவித்தார். புதிய அரசியல் கட்சி தொடங்குவதற்கான முதற்கட்டமாக இந்த அமைப்பை அவர் நிறுவியுள்ள நிலையில், குறுகிய காலத்திற்குள்ளேயே இதில் சுமார் 20 லட்சம் உறுப்பினர்கள் இணைந்து தமிழக அரசியல் களத்தில் வியப்பை ஏற்படுத்தியுள்ளனர்.

பொள்ளாச்சி – கோவை தேசிய நெடுஞ்சாலையில் உள்ள ஆச்சிபட்டி அருகே சுமார் 15 ஏக்கர் பரப்பளவில் இந்த மாநாட்டிற்கான ஏற்பாடுகள் மிகப்பிரம்மாண்டமாகச் செய்யப்பட்டுள்ளன. ‘போதையில்லா பொள்ளாச்சி’ என்ற பெயரில் போதைப்பொருள் ஒழிப்பு விழிப்புணர்வை மையமாக வைத்து நடத்தப்படும் இம்மாநாட்டிற்கு வரும் பொதுமக்களுக்காகக் குடிநீர், தற்காலிகக் கழிப்பறைகள், அவசர மருத்துவக் குழுக்கள் மற்றும் வாகன நிறுத்துமிடங்கள் உள்ளிட்ட அனைத்து அடிப்படை வசதிகளும் விரிவாகச் செய்யப்பட்டுள்ளன. தமிழகம் முழுவதும் இன்னும் இந்த அமைப்பிற்கான உறுப்பினர் சேர்க்கை தீவிரமாக நடந்து வரும் சூழலில், இந்த மாநாடு அண்ணாமலையின் அடுத்தகட்ட அரசியல் நகர்விற்கான ஒரு முக்கிய அடித்தளமாகப் பார்க்கப்படுகிறது.

பாஜகவிலிருந்து விலகிய பிறகு செய்தியாளர்களின் கேள்விகளுக்குப் பதிலளிக்காமல் அண்ணாமலை நீண்ட நாட்களாக மௌனம் காத்து வந்தார். சமீபத்தில் கரூரில் நிலப் பட்டா மாற்றம் தொடர்பாக தவெக அரசு எடுத்த முடிவிற்கு அவர் வரவேற்பு தெரிவித்திருந்ததும் குறிப்பிடத்தக்கது. இந்த நிலையில், இன்று மாலை நடைபெறவிருக்கும் மாநாட்டின் மேடையில் அண்ணாமலை தனது எதிர்கால அரசியல் வியூகங்கள் குறித்தும், புதிய கட்சி தொடங்குவது குறித்தும் என்ன பேசப் போகிறார் என்ற பெரும் எதிர்பார்ப்பும், பரபரப்பும் அவரது ஆதரவாளர்கள் மற்றும் அரசியல் விமர்சகர்கள் மத்தியில் எழுந்துள்ளது.