“UAN நம்பர் இல்லையா? கவலைப்படாதீங்க!… ஆதார் இருந்தா போதும்… பழைய பிஎஃப் பணத்தை எடுக்க வந்துவிட்டது ‘இ-பிராப்தி’ போர்டல்”…!!

இந்தியாவில் லட்சக்கணக்கான பிஎஃப் (PF) சந்தாதாரர்கள் தங்கள் வேலை மாற்றத்தின் போது பழைய கணக்குகளைப் பராமரிக்கத் தவறியதால், ஆயிரக்கணக்கான கோடி ரூபாய் பணம் செயலற்ற நிலையில் முடங்கிக் கிடக்கிறது. குறிப்பாக 2014-ல் யுஏஎன் (UAN) எண் அறிமுகமாவதற்கு முன்பு, ஒவ்வொரு நிறுவனத்திற்கும் தனித்தனி கணக்குகள் இருந்ததால் இந்தப் பிரச்சனை ஏற்பட்டது. இதற்குத் தீர்வாக, முடங்கிக் கிடக்கும் பழைய பிஎஃப் பணத்தை ஊழியர்கள் எளிதாக மீட்க உதவும் வகையில், மத்திய அரசு ‘இ-பிராப்தி’ (e-Prapti) எனும் புதிய இணையதளத்தை அறிமுகப்படுத்தியுள்ளது.

‘இ-பிராப்தி’ என்பது ஊழியர்களின் பழைய மற்றும் செயலற்ற பிஎஃப் கணக்குகளைக் கண்டறிந்து, தற்போது பயன்பாட்டில் உள்ள கணக்குடன் இணைக்கும் ஒரு பாலமாகச் செயல்படும். பழைய நிறுவனங்களைத் தேடி அலைய வேண்டிய அவசியமின்றி, ஒருவரது ஆதார் தகவல்களை அடிப்படையாகக் கொண்டே இந்தக் கணக்குகளைத் தானாக அடையாளம் காணும் வகையில் இதன் தொழில்நுட்பம் வடிவமைக்கப்பட்டுள்ளது. இதன் மூலம், பல ஆண்டுகளாகக் கிடப்பில் இருந்த பணத்தை எவ்விதமான காகித வேலைகளும் இன்றி டிஜிட்டல் முறையில் மீட்க முடியும்.

இந்த இணையதளம் செயல்பாட்டிற்கு வரும்போது, பயனர்கள் தங்கள் ஆதார் தரவுகளைப் பயன்படுத்தி லாகின் செய்து, தங்களின் பெயரில் உள்ள அனைத்து பழைய கணக்குகளையும் பட்டியலிட முடியும். விவரங்களைச் சரிபார்த்து உறுதி செய்த பிறகு, அந்தப் பழைய தொகையைத் தற்போதைய யுஏஎன் எண்ணுடன் இணைத்துக்கொள்ளலாம். இ.பி.எஃப்.ஓ (EPFO) மேற்கொண்டு வரும் டிஜிட்டல் சீர்திருத்தங்களின் ஒரு பகுதியாக, இந்தத் தானியங்கி முறை அறிமுகப்படுத்தப்பட்டுள்ளது.

இந்தத் திட்டம் பல்வேறு கட்டங்களாக நடைமுறைக்கு வரவுள்ளது. முதற்கட்டமாகப் பழைய கணக்கு விவரங்கள் ஓரளவிற்குத் தெரிந்தவர்களுக்கும், அடுத்தடுத்த கட்டங்களில் விவரங்கள் ஏதும் இல்லாதவர்களுக்கும் இது உதவிகரமாக இருக்கும். அதிகாரப்பூர்வத் தொடக்க தேதி இன்னும் சில மாதங்களில் அறிவிக்கப்படும் என்று எதிர்பார்க்கப்படுகிறது. இதன் மூலம் ஊழியர்கள் தாங்கள் உழைத்துச் சேர்த்த, ஆனால் மறந்து போன பணத்தை மிக எளிதாகத் திரும்பப் பெற மத்திய அரசு வழிவகை செய்துள்ளது.