“பத்தாம் வகுப்பு தேர்வில் அதிரடி மாற்றம்…” விடைத்தாள் முதல் ஆசிரியர்கள் வரை… அரசு வெளியிட்ட புது ரூல்ஸ்…!!

தமிழகத்தில் தற்போது நடைபெற்று வரும் பத்தாம் வகுப்பு பொதுத்தேர்வு நடைமுறைகளில் அரசு தேர்வுகள் இயக்ககம் சில முக்கியமான மாற்றங்களை அறிவித்துள்ளது. அதன்படி, கணிதம், அறிவியல் மற்றும் சமூக அறிவியல் போன்ற பாடங்களுக்கான விடைத்தாள்களில், மாணவர்களின் விவரங்கள் அடங்கிய முகப்புத்தாள் சரியாகத் தைக்கப்பட்டுள்ளதா என்பதைத் தேர்வுக்கு முன்னரே அதிகாரிகள் உறுதி செய்ய வேண்டும். மேலும், தேர்வு அறைகளில் கண்காணிப்பாளர்களாக 6 முதல் 8-ஆம் வகுப்பு வரை பாடம் நடத்தும் ஆசிரியர்களை மட்டுமே நியமிக்க வேண்டும் என்றும், கூடுதல் விடைத்தாள்களைப் போதிய அளவில் கையிருப்பில் வைத்திருக்கவும் உத்தரவிடப்பட்டுள்ளது.

தேர்வு எழுதும் மாணவர்களுக்கு உதவியாக நியமிக்கப்படும் ‘ஸ்கிரைப்’ (Scribe) பணியில், அந்தந்தப் பாடங்களைப் பயிற்றுவிக்கும் ஆசிரியர்களை எக்காரணம் கொண்டும் பணியமர்த்தக் கூடாது எனத் தெளிவுபடுத்தப்பட்டுள்ளது. மார்ச் 11-ல் தொடங்கிய இந்தப் பொதுத்தேர்வுகள் ஏப்ரல் 6-ஆம் தேதியுடன் முடிவடைய உள்ள நிலையில், தேர்வில் எவ்வித முறைகேடுகளும் நடக்காமல் இருக்க இந்த அதிரடி கட்டுப்பாடுகள் விதிக்கப்பட்டுள்ளன. இது தொடர்பாக அனைத்து மாவட்ட முதன்மைக் கல்வி அலுவலர்களுக்கும் முறையான சுற்றறிக்கை அனுப்பப்பட்டு, விதிமுறைகளைத் தீவிரமாகப் பின்பற்ற அறிவுறுத்தப்பட்டுள்ளது.