3 மாசம் தான் டைம்…! சிலிண்டர் விநியோகம் நிறுத்தம்…. மத்திய அரசின் புதிய எரிவாயு கொள்கை என்ன…?

ஈரான் போர்ச் சூழல் மற்றும் உலகளாவிய எரிபொருள் தட்டுப்பாட்டைக் கருத்தில் கொண்டு, இந்தியாவில் சமையல் எரிவாயு விநியோகத்தை முறைப்படுத்த மத்திய அரசு அதிரடியான புதிய விதிகளைக் கொண்டு வந்துள்ளது. இதன்படி, குழாய் மூலம் எரிவாயு (PNG) இணைப்பு வசதி உள்ள வீடுகளில் இனி எல்பிஜி சிலிண்டர்களைப் பயன்படுத்தத் தடை விதிக்கப்பட்டுள்ளது. ஏற்கனவே பிஎன்ஜி இணைப்பு வைத்திருப்பவர்கள் தங்களிடம் உள்ள சிலிண்டர்களை உடனடியாக அரசிடம் ஒப்படைக்க வேண்டும்; மேலும், அத்தகைய பகுதிகளில் வசிப்பவர்கள் இனி புதிய சிலிண்டர் இணைப்புகளைப் பெறவோ அல்லது சிலிண்டர்களை முன்பதிவு செய்யவோ முடியாது.

குழாய் எரிவாயு வசதி உள்ள பகுதிகளுக்கு இது தொடர்பாகத் தபால் மூலம் அறிவிப்புகள் அனுப்பப்பட்டு வருகின்றன. இந்த அறிவிப்பு கிடைத்த மூன்று மாத காலத்திற்குப் பிறகு, அந்த முகவரிக்குச் சிலிண்டர் விநியோகம் முற்றிலுமாக நிறுத்தப்படும். பிஎன்ஜி என்பது பாதுகாப்பானது, தடையின்றி கிடைக்கக்கூடியது மற்றும் இறக்குமதிச் செலவைக் குறைக்க உதவும் என்பதால் இந்த மாற்றத்தை அரசு கட்டாயமாக்கியுள்ளது. தமிழகம் உள்ளிட்ட அனைத்து மாநிலங்களிலும் இந்த விதிமுறைகளைத் தீவிரமாக அமல்படுத்தவும், விதிகளை மீறுபவர்கள் மீது நடவடிக்கை எடுக்கவும் மாவட்ட ஆட்சியர்களுக்கு உத்தரவிடப்பட்டுள்ளது.