“ஓட்டு கேட்க வந்தவனுக்கே ஓட்டு இல்ல”…. மதுராந்தகம் இடைத்தேர்தலில் வெளியான அதிர்ச்சி தகவல்…. திமுக, அதிமுக, தவெக வேட்பாளர்களுக்கு ஷாக்….!

செங்கல்பட்டு மாவட்டம் மதுராந்தகம் (தனி) சட்டமன்றத் தொகுதிக்கான இடைத்தேர்தல் வாக்குப்பதிவு இன்று காலை முதலே விறுவிறுப்பாக தொடங்கி நடைபெற்று வருகிறது. தொகுதி முழுவதும் அமைக்கப்பட்டுள்ள 285 வாக்குச்சாவடிகளிலும் வாக்காளர்கள் நீண்ட வரிசையில் நின்று ஆர்வத்துடன் வாக்களித்து வருகின்றனர். தேர்தல் அமைதியாகவும் சுதந்திரமாகவும் நடப்பதை உறுதிசெய்யும் வகையில், வாக்குச்சாவடி மையங்களைச் சுற்றி 100 மீட்டர் சுற்றளவுக்குள் பிரச்சாரம் செய்யத் தடை விதிக்கப்பட்டு, தேர்தல் ஆணையத்தின் கட்டுப்பாடுகளும் பாதுகாப்பு நடவடிக்கைகளும் பலப்படுத்தப்பட்டுள்ளன.

இத்தேர்தலில் திமுக சார்பில் பரந்தாமன், அதிமுக சார்பில் கணிதா சம்பத், தவெக சார்பில் மரகதம் குமரவேல், சிபிஎம் சார்பில் சுகந்தி மற்றும் நாம் தமிழர் கட்சி சார்பில் ஜானகிராமன் என ஐந்து முனைப் போட்டி நிலவுகிறது. களத்தில் நிற்கும் இந்த முக்கிய வேட்பாளர்களிடையே நிலவும் கடுமையான போட்டியால், வெற்றி வாய்ப்பு யாருக்குச் சாதகமாக இருக்கும் என்பதைக் கணிப்பது தேர்தல் ஆய்வாளர்களுக்கே சவாலாக மாறியுள்ளது.

இந்நிலையில், களத்தில் போட்டியிடும் 5 முக்கிய வேட்பாளர்களில் 4 பேருக்கு மதுராந்தகம் தொகுதியில் வாக்களிக்கும் உரிமை இல்லை என்ற சுவாரஸ்யமான தகவல் வெளிவந்துள்ளது. திமுக வேட்பாளர் பரந்தாமனுக்கு எழும்பூரிலும், அதிமுக வேட்பாளர் கணிதா சம்பத்திற்கு செங்கல்பட்டிலும், தவெக வேட்பாளர் மரகதம் குமரவேலுக்கு திருப்போரூரிலும், சிபிஎம் வேட்பாளர் சுகந்திக்கு ஸ்ரீவில்லிபுத்தூரிலும் வாக்குரிமை உள்ளது. இதனால் இவர்கள் நால்வராலும் இத்தொகுதியில் வாக்களிக்க முடியாத நிலை ஏற்பட்டுள்ள நிலையில், மதுராந்தகம் தொகுதியில் சொந்தமாக வாக்குரிமை கொண்ட நாம் தமிழர் கட்சி வேட்பாளர் ஜானகிராமன் மட்டுமே இத்தேர்தலில் தனது வாக்கைப்பதிவு செய்யவுள்ளார்.