“பெண்கள் பாதுகாப்பு பற்றிப் பேசும் மேடையில் இவ்வளவு வக்கிரமாகவா பேசுவது?”… பரபரக்கும் அரசியல் களம்… கொந்தளிக்கும் நெட்டிசன்கள்..!!!

திண்டுக்கல் மணிக்கூண்டு பகுதியில் அதிமுக சார்பில் நடைபெற்ற கண்டன ஆர்ப்பாட்டத்தில், முன்னாள் அமைச்சர் திண்டுக்கல் சீனிவாசன் பேசிய கருத்துக்கள் தற்போது பெரும் சர்ச்சையை ஏற்படுத்தியுள்ளன. திமுக அரசு பெண்களுக்கு வழங்கும் இலவசப் பொருட்கள் மற்றும் பண விநியோகம் குறித்து விமர்சித்த அவர், “திமுகவினர் முதலில் பணம் கொடுத்தார்கள், பிறகு ஹாட் பாக்ஸ் கொடுத்தார்கள், இப்போது சேலை கொடுத்திருக்கிறார்கள். ஆனால் பாவாடை இல்லாமல் எப்படி சேலை கட்டுவது என்று பெண்கள் கேட்கிறார்கள்” எனப் பேசியுள்ளார்.

மேலும் பெண்களுக்கு எதிரான பாலியல் குற்றங்களைக் கண்டித்து நடத்தப்பட்ட போராட்டத்திலேயே, ஒரு முன்னாள் அமைச்சர் பெண்களை இழிவுபடுத்தும் வகையில் இத்தகைய இரட்டை அர்த்தவசனங்களைப் பேசியுள்ளது அரசியல் வட்டாரத்தில் அதிர்ச்சியை ஏற்படுத்தியுள்ளது. ஏற்கனவே விக்கிரவாண்டி இடைத்தேர்தல் பிரச்சாரத்தின் போது முன்னாள் அமைச்சர் சி.வி. சண்முகம் நடிகை நயன்தாரா குறித்து பேசிய சர்ச்சை அடங்குவதற்குள், திண்டுக்கல் சீனிவாசனின் இந்தப் பேச்சு நெட்டிசன்களிடையே கடும் கண்டனங்களைப் பெற்று வருகிறது.

இந்நிலையில் சமூக வலைதளங்களில் பலரும், “பெண்கள் பாதுகாப்பு பற்றிப் பேசும் மேடையில் இவ்வளவு வக்கிரமாகவா பேசுவது?” என்று கேள்வி எழுப்பி வருகின்றனர். அதிமுகவின் மூத்த தலைவர்கள் அடுத்தடுத்து இத்தகைய சர்ச்சைக்குரிய கருத்துகளைத் தெரிவிப்பது அக்கட்சிக்குத் தேர்தல் களத்தில் பின்னடைவை ஏற்படுத்தக்கூடும் என அரசியல் விமர்சகர்கள் கருதுகின்றனர்.