செங்கோட்டையன் அண்ணே..! இது விசில் சத்தம் போல இல்ல… குண்டு வெடிக்கும் சத்தம் போல தெரியுது… வம்பிழுத்த தமிழிசை..!!

தமிழக சட்டமன்றத் தேர்தல் முடிவுகள் குறித்த எதிர்பார்ப்பு மாநிலம் முழுவதும் அதிகரித்துள்ள நிலையில், அரசியல் தலைவர்களிடையே காரசாரமான வார்த்தைப் போர் தொடங்கியுள்ளது. கடந்த ஏப்ரல் 23-ஆம் தேதி நடைபெற்ற தேர்தலில் யாரும் எதிர்பாராத விதமாக 85.15 சதவீதம் வாக்குகள் பதிவாகி சாதனை படைத்துள்ளது. இந்த வாக்குகள் வரும் மே 4-ஆம் தேதி எண்ணப்பட உள்ள நிலையில், தமிழக வெற்றி கழகம் (த.வெ.க) மற்றும் பாஜக இடையிலான கருத்து மோதல்கள் தற்போதைய அரசியல் களத்தைச் சூடாக்கியுள்ளன.

பழனியில் செய்தியாளர்களைச் சந்தித்த தமிழக வெற்றி கழகத்தின் மூத்த நிர்வாகி செங்கோட்டையன், தேர்தலுக்குப் பிந்தைய நிலவரம் குறித்து மிகுந்த நம்பிக்கையுடன் பேசினார். அப்போது அவர், “தமிழகத்தில் இதுவரை பசுமைப் புரட்சி, வெண்மைப் புரட்சி எனப் பல புரட்சிகளைப் பார்த்திருக்கிறோம். ஆனால், மே 4-ஆம் தேதி நாம் காணப்போவது த.வெ.க தலைவர் விஜய்யின் ‘விசில் புரட்சி’ தான். மக்கள் மாற்றத்தை விரும்புகிறார்கள், அதன் அடிப்படையில் 200-க்கும் மேற்பட்ட இடங்களில் வெற்றி பெற்று ஆட்சியைப் பிடிப்போம்” என்று அதிரடியாகத் தெரிவித்தார்.

செங்கோட்டையனின் இந்த “200 இடங்கள்” மற்றும் “விசில் புரட்சி” கருத்துக்குத் தமிழக பாஜக முன்னாள் தலைவர் தமிழிசை சௌந்தரராஜன் கடுமையான விமர்சனத்தை முன்வைத்துள்ளார். சென்னை விமான நிலையத்தில் செய்தியாளர்களிடம் பேசிய அவர், 200 இடங்களைத் தாண்டி விசில் சத்தம் ஒலிக்கும் என்பது எல்லாம் மிகைப்படுத்தப்பட்ட ஒன்று என்று சாடினார். செங்கோட்டையன் கூறுவது விசில் சத்தம் போலத் தெரியவில்லை, அது ஏதோ ‘பாம்’ (Bomb) வெடிக்கும் சத்தம் போலத் தெரிவதாகவும் அவர் கிண்டல் செய்தார்.

மேலும், விசிலுக்கு என்று ஒரு குறிப்பிட்ட அளவு சத்தம் மட்டுமே உண்டு என்றும், 200 இடங்களைத் தாண்டி விசில் ஒலிக்கும் என்பது ஒரு பிரம்மாண்டமான பகற்கனவு என்றும் தமிழிசை குறிப்பிட்டார். அண்ணன் செங்கோட்டையன் போன்றவர்கள் இது போன்ற கற்பனைக் கோட்டைகளைக் கட்டுவது மக்களுக்கு நன்கு புரியும் என்று விமர்சித்த அவர், தேர்தல் முடிவுகள் வரும்போது உண்மை நிலை தெரியவரும் எனத் தெரிவித்தார். மே 4-ஆம் தேதி வெளியாகவுள்ள தேர்தல் முடிவுகள் இந்த விவாதங்களுக்கு முற்றுப்புள்ளி வைக்கும் என்பதால் ஒட்டுமொத்த தமிழகமும் ஆவலுடன் காத்திருக்கிறது.