“300 ஹோட்டல்ல தங்கியிருக்கேன்.. ஒரு ரூபா பில் கட்டுனது இல்ல…!” சொகுசு ஹோட்டல்களை அலறவிட்ட… 69 வயது ‘தமிழ்நாடு கில்லாடி தாத்தா’ சிக்கியது எப்படி…?

இந்தியாவிலுள்ள நட்சத்திர ஹோட்டல்களில் கடந்த 30 வருடங்களாகப் போலி அடையாளங்களைப் பயன்படுத்தி, பில் கட்டாமல் ஏமாற்றி வந்த தமிழ்நாட்டைச் சேர்ந்த 69 வயது முதியவரான பின்க்சன் ஜான் என்பவரைப் போலீசார் கைது செய்துள்ளனர். இவர் தன்னை ஒரு வெளிநாட்டுச் சுற்றுலா வழிகாட்டி, யோகா மாஸ்டர் அல்லது ஆங்கில ஆசிரியர் எனப் போலியாக அறிமுகப்படுத்திக் கொண்டு ஐந்து நட்சத்திர ஹோட்டல்களில் தங்குவதை வழக்கமாகக் கொண்டிருந்தார். சமீபத்தில் ராய்ப்பூரிலுள்ள ஹயாத் ஹோட்டலில் தங்கி, ரூ.63,755 பில் தொகையைச் செலுத்தாமல் ஏமாற்றியதோடு, அங்கிருந்த ரூ.1.48 லட்சம் மதிப்புள்ள லேப்டாப்பையும் திருடிச் சென்றுள்ளார். ஹோட்டல் நிர்வாகத்தின் புகாரைத் தொடர்ந்து தீவிர விசாரணை நடத்திய போலீசார், ஒடிசாவின் புவனேஸ்வரில் இவரைத் தேடிக் கண்டுபிடித்துக் கைது செய்து, லேப்டாப்பையும் மீட்டனர்.

போலீசாரின் விசாரணையில், இவர் 1990 ஆம் ஆண்டு முதல் நாடு முழுவதும் 300-க்கும் மேற்பட்ட சொகுசு ஹோட்டல்களை இதே பாணியில் ஏமாற்றியதை ஒப்புக்கொண்டார். 1980-களில் டெல்லியில் சுற்றுலா வழிகாட்டியாக இருந்தபோது ஒரு ஹோட்டல் ஊழியர்களால் தான் அவமதிக்கப்பட்டதாகவும், அதற்குப் பழிவாங்கவே சொகுசு ஹோட்டல்களை இவ்வாறு ஏமாற்றத் தொடங்கியதாகவும் அவர் போலீசாரிடம் கூறியுள்ளார்.

மேலும், 1996-ல் முதன்முதலில் கைதாகி சிறைக்குச் சென்றபோது, அங்கு அடைக்கப்பட்டிருந்த பிரபல சர்வதேச மோசடி மன்னன் சார்லஸ் சோப்ராஜின் ஏமாற்று வித்தைகளால் ஈர்க்கப்பட்டு, அவரைப் போலவே போலி அடையாளங்களைப் பயன்படுத்தத் தொடங்கியுள்ளார். ஏற்கனவே கேரளா, தமிழ்நாடு, கோவா உட்படப் பல மாநிலங்களில் பல்வேறு மோசடி வழக்குகளுக்காக 15 ஆண்டுகள் சிறைத் தண்டனை அனுபவித்துள்ள பின்க்சன் ஜான் மீது, தற்போது ராய்ப்பூர் போலீசார் சட்டப்படியான மேல் நடவடிக்கைகளை எடுத்து வருகின்றனர்.