“மன்னர் பரம்பரை மண்ணாங்கட்டி பரம்பரை”…. சான்ட்னரின் ‘Silence’ சவால் – சிரித்துக்கொண்டே பதிலடி கொடுத்த சூர்யகுமார்…. ஆட்டம் முடிவில் நடந்தது என்ன…?

2026-ஆம் ஆண்டு நடைபெற்ற டி20 உலகக் கோப்பை இறுதிப் போட்டியில் நியூசிலாந்து அணியை வீழ்த்தி இந்திய அணி வரலாற்றுச் சாதனை படைத்துள்ளது. இப்போட்டியில் முதலில் பேட்டிங் செய்த இந்திய அணி, நிர்ணயிக்கப்பட்ட 20 ஓவர்களில் 255 ரன்கள் குவித்து டி20 உலகக் கோப்பை இறுதிப் போட்டியில் அதிகபட்ச ரன்களைப் பதிவு செய்த அணி என்ற பெருமையைப் பெற்றது. இந்தப் பிரம்மாண்ட இலக்கை நோக்கி ஆடிய நியூசிலாந்து அணி இந்தியப் பந்துவீச்சை எதிர்கொள்ள முடியாமல் திணறியது.

இந்த வெற்றியின் நாயகனாகத் திகழ்ந்த சஞ்சு சாம்சன், அதிரடியாக விளையாடி 89 ரன்கள் குவித்து இந்திய அணியின் ஸ்கோர் உயர்வுக்கு முக்கியக் காரணமாக அமைந்தார். இவரது ஆட்டத்தை தமிழக முதலமைச்சர் மு.க. ஸ்டாலின் மற்றும் கிரிக்கெட் ஜாம்பவான் சச்சின் டெண்டுல்கர் ஆகியோர் வெகுவாகப் பாராட்டியுள்ளனர். குறிப்பாக, விராட் கோலியின் சில சாதனைகளை முறியடித்த சஞ்சு சாம்சனின் ஆட்டம் ரசிகர்களிடையே பெரும் உற்சாகத்தை ஏற்படுத்தியது.

இந்திய அணியின் பயிற்சியாளர் கௌதம் கம்பீருக்கும் இந்த வெற்றி ஒரு மைல்கல்லாக அமைந்தது. சர்வதேச கிரிக்கெட் கவுன்சிலின் (ICC) இரண்டு முக்கியக் கோப்பைகளை வென்ற முதல் இந்திய பயிற்சியாளர் என்ற பெருமையை அவர் இதன் மூலம் பெற்றுள்ளார். அவரது ஆலோசனைகளும் வியூகங்களும் இந்திய அணியை ஒரு வலுவான நிலைக்குக் கொண்டு சென்றதாக விளையாட்டு விமர்சகர்கள் புகழாரம் சூட்டி வருகின்றனர்.

இறுதியில் 96 ரன்கள் வித்தியாசத்தில் நியூசிலாந்தை வீழ்த்திய இந்திய அணி, மூன்றாவது முறையாக டி20 உலகக் கோப்பையைக் கைப்பற்றி மகுடம் சூடியது. இந்த வெற்றியை இந்தியா முழுவதும் உள்ள கிரிக்கெட் ரசிகர்கள் பட்டாசு வெடித்தும் இனிப்புகள் வழங்கியும் கோலாகலமாகக் கொண்டாடி வருகின்றனர். உலக அரங்கில் இந்திய கிரிக்கெட்டின் ஆதிக்கத்தை இந்த வெற்றி மீண்டும் ஒருமுறை உறுதிப்படுத்தியுள்ளது.

இந்தியா மற்றும் நியூசிலாந்து அணிகளுக்கு இடையிலான இறுதிப்போட்டிக்கு முன்பாக, நியூசிலாந்து கேப்டன் மிட்செல் சான்ட்னரின் கருத்துக்கள் சமூக வலைதளங்களில் பெரும் விவாதத்தை ஏற்படுத்தின. செய்தியாளர் சந்திப்பில் பேசிய அவர், “ஒரு முறை கோப்பையை வெல்வதற்காகச் சிலரின் இதயங்களை உடைப்பதில் எனக்கு எந்த வருத்தமும் இல்லை; இந்திய ரசிகர்களை அமைதிப்படுத்துவதே எங்கள் இலக்கு” என்று சற்றே சவாலாகக் குறிப்பிட்டிருந்தார். இதற்குப் பதிலளித்த இந்திய கேப்டன் சூர்யகுமார் யாதவ், “எல்லோரும் இதே போன்ற வார்த்தைகளையே திரும்பத் திரும்பக் கூறுகிறார்கள், புதிதாக எதாவது சொல்லுங்கள்” எனத் தனது பாணியில் மிக லாவகமாகவும், சிரிப்புடனும் சான்ட்னருக்குப் பதிலடி கொடுத்திருந்தார்.

இந்த வார்த்தைப் போர் ஒருபுறம் இருக்க, களத்தில் இந்திய வீரர்கள் ஆக்ரோஷமான ஆட்டத்தை வெளிப்படுத்தினர். பேட்டிங் மற்றும் பந்துவீச்சு என இரண்டிலும் அபாரமான ஆதிக்கத்தைச் செலுத்திய இந்திய அணி, நியூசிலாந்தை வீழ்த்தி அபார வெற்றி பெற்றது. சான்ட்னர் கூறியது போல ரசிகர்களை அமைதிப்படுத்த விடாமல், இந்திய வீரர்கள் தங்களது அதிரடி ஆட்டத்தால் மைதானத்தை அதிர வைத்தனர். “வெற்று பேச்சுகளை விடச் செயலே சிறந்தது” என்பதை நிரூபிக்கும் வகையில், இந்திய அணி நியூசிலாந்து கேப்டனின் சவாலுக்குத் தகுந்த பதிலடி கொடுத்து மகுடம் சூடியது ரசிகர்களிடையே நெகிழ்ச்சியையும் உற்சாகத்தையும் ஏற்படுத்தியுள்ளது.