ரூ. 50,000 முதலீடு..! கைநிறைய ரூ. 13 லட்சம் பணம்… தபால் நிலையத்தின் இந்த சூப்பர் பிளான் தெரியுமா..?

மத்திய அரசால் செயல்படுத்தப்படும் PPF சேமிப்பு திட்டம் நீண்ட கால முதலீட்டிற்கு மிகவும் பாதுகாப்பான மற்றும் லாபகரமான ஒன்றாகக் கருதப்படுகிறது. இத்திட்டத்தில் தற்போது ஆண்டுக்கு 7.1 சதவீத வட்டி வழங்கப்படுகிறது. ஒரு நிதியாண்டில் குறைந்தபட்சம் 500 ரூபாய் முதல் அதிகபட்சம் 1.50 லட்சம் ரூபாய் வரை இதில் டெபாசிட் செய்யலாம். 15 ஆண்டுகள் முதிர்வு காலம் கொண்ட இத்திட்டம், சந்தை அபாயங்கள் அற்றது என்பதால் நடுத்தர வர்க்கத்தினரிடையே பெரும் வரவேற்பைப் பெற்றுள்ளது.

நீங்கள் ஒவ்வொரு ஆண்டும் 50,000 ரூபாய் வீதம் 15 ஆண்டுகளுக்கு முதலீடு செய்தால், உங்கள் மொத்த முதலீட்டுத் தொகை 7,50,000 ரூபாயாக இருக்கும். 15 ஆண்டுகால முடிவில், கூட்டு வட்டி முறையில் உங்களுக்குக் கிடைக்கும் வட்டி மட்டும் சுமார் 6,06,070 ரூபாயாகும். இதன் மூலம் முதிர்வு காலத்தில் நீங்கள் மொத்தம் 13,56,070 ரூபாயை முதிர்வுத் தொகையாகப் பெற முடியும். இந்தத் தொகை உங்கள் எதிர்காலத் தேவைகளுக்கும் அல்லது குழந்தைகளின் கல்விச் செலவுகளுக்கும் பெரிதும் உதவியாக இருக்கும்.

இத்திட்டத்தின் மற்றொரு சிறப்பம்சம் இதிலுள்ள வரிச்லுகைகள் ஆகும். வருமான வரிச் சட்டத்தின் கீழ் (Section 80C), நீங்கள் செய்யும் முதலீடு, ஈட்டும் வட்டி மற்றும் முதிர்வுத் தொகை ஆகிய மூன்றிற்கும் வரி விலக்கு அளிக்கப்படுகிறது. மேலும், கணக்கைத் தொடங்கி 15 ஆண்டுகளுக்குப் பிறகும், தேவைப்பட்டால் 5 ஆண்டு தொகுப்புகளாக (Blocks of 5 years) காலத்தை நீட்டித்துக் கொள்ளும் வசதியும் உள்ளது. அவசர காலங்களில் 7-வது ஆண்டிலிருந்து பகுதியளவு பணத்தை எடுக்கும் வசதி மற்றும் கடனுதவி வசதிகளும் இத்திட்டத்தில் உள்ளன.