“நீ கொஞ்சம் வெளிய வா…” கிளாஸ் ரூமில் இருந்து வெளியே அழைத்து வந்து… மாணவரை குத்தி கொலை செய்த கொடூரம்…. கல்லூரி வளாகத்தில் அரங்கேறிய பயங்கரம்…!!

கர்நாடக மாநிலம் பெங்களூரு நாகரபாவி பகுதியில் உள்ள தனியார் கல்லூரியில், மாணவர் குழுக்களுக்கு இடையே ஏற்பட்ட பயங்கர மோதலில், முதலாமாண்டு பி.காம் மாணவர் கத்தியால் குத்திக் கொடூரமாகக் கொலை செய்யப்பட்ட சம்பவம் பெரும் பரபரப்பையும் அதிர்ச்சியையும் ஏற்படுத்தியுள்ளது. நாகரபாவியில் உள்ள தனியார் கல்லூரியில் பி.காம் முதலாமாண்டு படித்து வந்த யோகேஷ் (19) என்ற மாணவர், புதன்கிழமை வகுப்பறையில் பாடம் கவனித்துக் கொண்டிருந்தபோது, அவரது நண்பர் ஒருவர் அவரை வெளியே அழைத்துள்ளார். கல்லூரி வளாகத்திற்கு வெளியே வந்தபோது, அங்கு இரு குழுக்களாகப் பிரிந்திருந்த மாணவர்களுக்கிடையே திடீரெனக் கடுமையான வாக்குவாதம் ஏற்பட்டு மோதலாக மாறியது.

இந்த மோதலின் போது, கும்பலில் இருந்த நபர் ஒருவன் தான் மறைத்து வைத்திருந்த கத்தியை எடுத்து யோகேஷின் உடலில் சரமாரியாகக் குத்தியுள்ளான். இதில் பலத்த காயமடைந்து ரத்த வெள்ளத்தில் மிதந்த யோகேஷ், உடனடியாக அருகிலுள்ள மருத்துவமனைக்குக் கொண்டு செல்லப்பட்டார். எனினும், அங்குச் சிகிச்சை பலனின்றி பரிதாபமாக உயிரிழந்தார். இச்சம்பவத்தில் 4 முதல் 5 பேருக்குத் தொடர்பு இருப்பதாகத் தெரிவித்துள்ள காவல்துறையினர், ஒருவரை அடையாளம் கண்டுள்ளதாகவும், தலைமறைவாக உள்ள மற்றவர்களைத் தீவிரமாகத் தேடி வருவதாகவும் தெரிவித்துள்ளனர்.