அரசியல் பலம் யாருக்கு..? மோதிப் பார்க்கலாமா..? ஒரே இடத்தில் ஸ்டாலின்-விஜய்… தமிழக அரசியலில் புதிய பரபரப்பு…!!

தமிழக அரசியலில் திருப்புமுனையை ஏற்படுத்தும் மாவட்டமாகக் கருதப்படும் திருச்சியில், ஒரே நேரத்தில் ஆளுங்கட்சியான திமுக மற்றும் புதிய வரவான தமிழக வெற்றிக் கழகம் (தவெக) ஆகிய இரு கட்சிகளும் மாநாடுகளை நடத்தத் திட்டமிட்டுள்ளது பெரும் பரபரப்பை ஏற்படுத்தியுள்ளது. திமுக தனது 12-வது மாநில மாநாட்டை வரும் மார்ச் 9-ம் தேதி திருச்சியில் உள்ள சிறுகனூரில் பிரம்மாண்டமாக நடத்த முழுவீச்சில் தயாராகி வருகிறது. இதற்காக சுமார் 10 லட்சம் தொண்டர்களைத் திரட்டி, “ஸ்டாலின் தொடரட்டும், தமிழ்நாடு வெல்லட்டும்” என்ற முழக்கத்துடன் 2026 தேர்தலுக்கான அடித்தளத்தை அமைக்க முதல்வர் மு.க.ஸ்டாலின் அழைப்பு விடுத்துள்ளார்.

அதே வேளையில், நடிகர் விஜய் தலைமையிலான தமிழக வெற்றிக் கழகம் தனது மூன்றாவது மாநில மாநாட்டை இம்மாத இறுதியில் திருச்சியில் நடத்தத் திட்டமிட்டுள்ளதாகத் தகவல்கள் வெளியாகியுள்ளன. ஏற்கனவே 2026 சட்டமன்றத் தேர்தல் என்பது திமுக-விற்கும் தவெக-விற்கும் இடையிலான நேரடிப் போட்டி என அறிவித்துள்ள விஜய், திருச்சியில் இந்த மாநாட்டை நடத்துவதன் மூலம் தனது அரசியல் பலத்தை நிரூபிக்க முனைப்பு காட்டி வருகிறார்.

தேர்தல் நெருங்கும் வேளையில், முதல்வர் ஸ்டாலினும் விஜயும் அடுத்தடுத்து திருச்சியில் மாநாடுகளை நடத்துவது அரசியல் வட்டாரத்தில் விவாதப் பொருளாகியுள்ளது. திமுக தனது ‘திராவிட மாடல் 2.0’ கொள்கையுடன் தேர்தலைச் சந்திக்கத் தயாராகி வரும் நிலையில், விஜய்யின் இந்த அறிவிப்பு ஒரு மும்முனைப் போட்டிக்கான சூழலை உருவாக்கியுள்ளது. திருச்சியில் நிலவும் இந்த அரசியல் பரபரப்பு, தமிழகத்தின் எதிர்கால அரசியல் நகர்வுகளில் ஒரு முக்கிய மாற்றத்தை ஏற்படுத்தும் என எதிர்பார்க்கப்படுகிறது.