“சன்ரைசர்ஸ் கண்டுபிடித்த வைரம்”… பிரஃபுல் ஹிங்கே எனும் புதிய புயல்… “ராஜஸ்தான் அணியை நிலைகுலைய வைத்த அந்த 3 பந்துகள்… கிரிக்கெட் உலகம் வியக்கும் ரகசியம்…!

2026 ஐபிஎல் தொடரில் சன்ரைசர்ஸ் ஹைதராபாத் அணிக்காக அறிமுகமாகி, ஒட்டுமொத்த கிரிக்கெட் உலகையும் தன் பக்கம் திரும்பிப் பார்க்க வைத்துள்ளார் இளம் வேகப்பந்து வீச்சாளர் பிரஃபுல் ஹிங்கே. ராஜஸ்தான் ராயல்ஸ் அணிக்கு எதிரான தனது அறிமுகப் போட்டியிலேயே, துல்லியமான வேகத்தாலும் அபாரமான ஸ்விங் பந்துகளாலும் அந்த அணியின் பேட்டிங் வரிசையை நிலைதடுமாறச் செய்தார். குறிப்பாக, தனது முதல் ஓவரிலேயே வைபவ் சூர்யவன்ஷி, துருவ் ஜூரல் மற்றும் பிரிட்டோரியஸ் ஆகிய மூன்று முக்கிய விக்கெட்டுகளை வீழ்த்தி ஆட்டத்தின் போக்கையே மாற்றிய பிரஃபுல், அறிமுக வீரராக முத்திரை பதித்து ஆட்ட நாயகன் விருதையும் தட்டிச் சென்றார்.

மகாராஷ்டிரா மாநிலம் நாக்பூரைச் சேர்ந்த பிரஃபுல் ஹிங்கேயின் இந்த வெற்றிப் பயணம் அத்தனை எளிதானதாக இருக்கவில்லை. ஆரம்பத்தில் விளையாட்டிற்கு தந்தையிடம் அனுமதி கிடைக்காத நிலையிலும், கோடைக்கால பயிற்சி முகாமில் தனது திறமையை நிரூபித்து குடும்பத்தின் ஆதரவைப் பெற்றார். படிப்பை விட கிரிக்கெட்டில் அதிக கவனம் செலுத்திய அவர், தினமும் சைக்கிளில் நீண்ட தூரம் பயணம் செய்து பயிற்சியில் ஈடுபட்டார். விதர்பா அணியின் U-19 பிரிவில் 36 விக்கெட்டுகளைக் கைப்பற்றியது மற்றும் MRF பவுலிங் அகாடமியில் பெற்ற பயிற்சி ஆகியவை இவரை ஒரு தேர்ந்த பந்துவீச்சாளராக மெருகேற்றின.

ஐபிஎல் 2026 ஏலத்தில் அடிப்படை விலையான ₹30 லட்சத்திற்கு சன்ரைசர்ஸ் அணியால் தேர்ந்தெடுக்கப்பட்டது இவரது வாழ்வில் மிகப்பெரிய திருப்புமுனையாக அமைந்தது. “பெற்றோரின் மகிழ்ச்சியைப் பார்த்த தருணமே எனது வாழ்வின் சிறந்த தருணம்” என்று நெகிழ்ச்சியுடன் குறிப்பிடும் பிரஃபுல், தனது வெற்றிக்குக் பின்னால் குடும்பத்தின் தியாகம் பெரிதாக இருப்பதாகக் கூறுகிறார். குறிப்பாக, அவரது சகோதரி தனது படிப்பையும் பொருட்படுத்தாமல் இவரைப் பயிற்சிக்கு அழைத்துச் சென்று மணிக்கணக்கில் காத்திருந்து ஊக்கமளித்தது இவரது முன்னேற்றத்திற்குப் பெரும் உந்துசக்தியாக இருந்துள்ளது.

தற்போது சன்ரைசர்ஸ் அணியில் பாட் கம்மின்ஸ், ஜெய்தேவ் உனட்கட் போன்ற அனுபவமிக்க வீரர்களுடன் இணைந்து விளையாடுவது பிரஃபுல் ஹிங்கேயின் தன்னம்பிக்கையை அதிகரித்துள்ளது. முதல்தர போட்டிகளில் ஏற்கனவே 27 விக்கெட்டுகளை வீழ்த்தியுள்ள இவரது வேகமும், பந்தைக் கட்டுப்படுத்தும் திறனும் இந்திய அணியில் இவருக்கு விரைவில் இடம் பெற்றுத் தரும் என கிரிக்கெட் வல்லுநர்கள் கணித்துள்ளனர். ஒரு சாதாரண பின்னணியில் இருந்து வந்து, கடின உழைப்பால் ஐபிஎல் மேடையில் ஜொலிக்கும் பிரஃபுல், நிச்சயம் இந்திய கிரிக்கெட்டின் எதிர்கால நட்சத்திரமாகத் திகழ்வார் என்பதில் ஐயமில்லை.