‘எனக்கு பாட்டு தொழில் இருக்கு ஆனா, உங்களுக்கு முதல் படம்’.. இயக்குனரை எச்சரித்த SPB.. கேளடி கண்மணி உருவான விதம்

தமிழ் சினிமாவில் பல இயக்குனர்களை உருவாக்கித் தந்த பல்கலைக்கழகங்களாக விளங்கியவர்கள் பாலச்சந்தரும், பாரதிராஜாவும். அவர்கள் உருவாக்கிய நட்சத்திரங்கள் ஒருபக்கம் தமிழ் சினிமாவைக் கலக்கியது ஒரு பக்கம் என்றால் மற்றொரு புறம் அவர்களிடம் இருந்து வந்த இயக்குனர்கள் மிகச்சிறந்த படங்களைக் கொடுத்தனர் என்பது மறுக்க முடியாத உண்மை.

அப்படி பாலச்சந்தரிடம் இருந்து வந்த இயக்குனர்களில் ஒருவர்தான் வசந்த். 1990 ஆம் ஆண்டு வெளியான கேளடி கண்மணி படத்தின் மூலம் தனது தனித்துவ முத்திரையை பதித்தவர் வசந்த். அந்த படத்தில் எஸ்பிபி, ராதிகா, கீதா, அஞ்சு, ரமேஷ் அரவிந்த் ஆகியோர் நடிக்க இளையராஜா இசையமைத்திருந்தார்.

படத்தின் கதைக்களமே வித்தியாசமானது. தன்னால் முறிந்து போன தந்தையின் காதலை மகளும் அவளின் காதலனும் சேர்ந்து சேர்த்து வைப்பதே கதை. இந்த படத்தில் நடுத்தர வயது அப்பாவாக எஸ் பி பி கலக்கியிருப்பார். இந்த படத்தில் எஸ் பி பியைக் கதாநாயகனாக்க வேண்டாம் என முதலில் பலரும் அவரை தடுத்துள்ளார்கள்.

தன்னிடம் இருக்கும் வலுவான கதைக்கு சற்று நடுத்தர வயதுள்ள ஹீரோதான் தேவை என்பதை மனதில் வைத்து பாடகர் எஸ்.பி.பாலசுப்ரமணியத்தை ஹீரோவாக்கினார் வசந்த். கேளடி கண்மணி கதையை இயக்குநர் வஸந்த் எஸ்.பி.பி-யிடம் சொல்லும் போது மக்கள் ஏற்றுக் கொள்வார்களா எனக்கு ஒன்றும் பிரச்சினை இல்லை. எனக்கு பாட்டுத் தொழில் இருக்கிறது. உங்களுக்கு முதல் படம் உங்கள் வருங்காலம் என்னால் கெட்டு விடக் கூடாது என எஸ்.பி.பி வஸந்திடம் சொல்லியிருக்கிறார்.

எஸ்பிபியே இப்படி சொன்னாலும் மனம் தளராத வசந்த், இந்த கதைக்கு இவர்தான் பொருத்தமான நடிகர் என முடிவு செய்து அவரையே நடிக்க வைத்துள்ளார். கேளடி கண்மணி திரைப்படம் வெளியாகி மிகப்பெரிய வெற்றியைப் பெற்றது. அந்த படத்தில் இடம்பெற்ற மண்ணில் இந்த காதலின்றி மற்றும் கற்பூர பொம்மை ஒன்று பாடல்கள் இன்றளவும் ரசிகர்களால் கொண்டாடப்படும் பாடல்களாக உள்ளன என்பது குறிப்பிடத்தக்கது.