“அதிமுக டூ தவெக.. இப்போ ரிவர்ஸ் கியர்?”…. எஸ்.பி. வேலுமணி போட்ட அந்த ஒற்றை ‘குண்டு’… பரபரக்கும் அரசியல் களம்….!

அதிமுக முன்னாள் அமைச்சர் எஸ்.பி. வேலுமணி, தமிழக வெற்றிக் கழகத்தில் இணைந்துள்ள முன்னாள் அதிமுக நிர்வாகிகள் மீண்டும் தாய்க்கழகத்திற்கே திரும்ப விரும்புவதாகத் தெரிவித்துள்ள கருத்து அரசியல் வட்டாரத்தில் பெரும் பரபரப்பை ஏற்படுத்தியுள்ளது. கோயம்புத்தூர் மாவட்டம் சூலூரில் நடைபெற்ற தேர்தல் பரப்புரைக் கூட்டத்தில் பேசிய அவர், தவெக-வில் இணைந்த பல நிர்வாகிகள் தன்னுடன் தொலைபேசியில் தொடர்பு கொண்டு பேசி வருவதாகக் குறிப்பிட்டார்.

விஜய் தலைமையிலான கட்சியில் இணைந்த முன்னாள் அதிமுகவினர், அங்கு தங்களுக்கு உரிய அங்கீகாரம் கிடைக்கவில்லை என்ற ஆதங்கத்தில் இருப்பதாக வேலுமணி சுட்டிக்காட்டினார். “அதிமுகவில் வழங்கப்பட்ட அதே பதவியையும் மரியாதையையும் மீண்டும் அளித்தால், நாங்கள் உடனே கட்சிக்குத் திரும்பத் தயாராக இருக்கிறோம்” என அவர்கள் தன்னிடம் கூறியதாக அவர் தெரிவித்தார். அதிமுகவில் தொண்டர்களுக்குக் கிடைக்கும் மதிப்பும் மரியாதையும் வேறு எந்தக் கட்சியிலும் கிடைக்காது என்பதை அவர்கள் தற்போது உணர்ந்துள்ளதாக அவர் மார்தட்டினார்.

நடிகர் விஜய் குறித்துப் பேசிய எஸ்.பி. வேலுமணி, அவர் தனது நெருங்கிய நண்பர் என்றும், சினிமாத் துறையில் அவருக்குப் பிரச்சனைகள் வந்தபோது எடப்பாடி பழனிசாமியைச் சந்திக்கத் தனது காரிலேயே அழைத்துச் சென்றதாகவும் பழைய நினைவுகளைப் பகிர்ந்து கொண்டார். இருப்பினும், அரசியல் என்று வரும்போது மக்களின் துயரங்களில் நேரில் பங்கெடுக்காத தலைவர்களை மக்கள் ஏற்க மாட்டார்கள் என்றும், கரூரில் நடந்த விபத்து போன்ற இக்கட்டான காலங்களில் விஜய் நேரில் சென்று ஆறுதல் சொல்லியிருக்க வேண்டும் என்றும் தனது விமர்சனத்தை முன்வைத்தார்.

சமீபத்தில் செங்கோட்டையன் போன்ற மூத்த தலைவர்கள் அதிமுகவிலிருந்து விலகி தவெக-வில் இணைந்தது கட்சிக்குப் பின்னடைவாகப் பார்க்கப்பட்டது. இந்தச் சூழலில், வேலுமணியின் இந்தப் பேச்சு தவெக நிர்வாகிகளிடையே ஒருவித குழப்பத்தையும், அதிமுக தொண்டர்களிடையே உற்சாகத்தையும் ஏற்படுத்தியுள்ளது. தேர்தல் நெருங்கும் வேளையில், நிர்வாகிகளைத் தக்கவைத்துக் கொள்ளவும், மாற்றுக் கட்சியினரைத் தங்கள் பக்கம் இழுக்கவும் அதிமுக மேற்கொள்ளும் ஒரு முக்கிய நகர்வாக இது பார்க்கப்படுகிறது.