“தேர்தலில் போட்டி இல்லை… அரசியலிலிருந்து விலகுகிறேன்”… சித்தராமையா பரபரப்பு அறிவிப்பு…!

கர்நாடக முதல்வர் சித்தராமையா, மண்டியா மாவட்டத்தில் நடைபெற்ற நிகழ்ச்சி ஒன்றில் உரையாற்றுகையில், வரும் 2028-ஆம் ஆண்டு நடைபெறவுள்ள சட்டமன்றத் தேர்தலில் தாம் போட்டியிடப் போவதில்லை என்ற அதிரடி அறிவிப்பை வெளியிட்டுள்ளார். தற்போதைய அரசியல் சூழலில் ஊழலும் பணநாயகமும் மலிந்துவிட்டதாகக் கவலை தெரிவித்த அவர், வாக்காளர்களுக்குப் பணம் கொடுத்தால் மட்டுமே தேர்தலைச் சந்திக்க முடியும் என்ற அவலநிலை உருவாகியுள்ளதால், இத்தகைய களம் தமக்கு உகந்ததல்ல என்று சுட்டிக்காட்டினார். மேலும், 2028-ல் தமக்கு 82 வயதாகிவிடும் என்பதால், வயது மூப்பு மற்றும் உடல்நலக் குறைவு காரணமாக முன்புபோல ஓடிப்பாடிப் பணியாற்ற முடியாது என்பதையும் தமக்குரிய வழக்கமான வெளிப்படைத்தன்மையுடன் ஒப்புக்கொண்டார். தொகுதி மக்கள் மீண்டும் போட்டியிட வற்புறுத்தினாலும், தேர்தலில் போட்டியிடுவதில்லை என்பதில் தாம் உறுதியாக இருப்பதாகவும் அவர் தெளிவுபடுத்தினார்.

தேர்தல் அரசியலிலிருந்து விலக முடிவு செய்தாலும், பொதுவாழ்வில் இருந்து தாம் ஒருபோதும் விலகப் போவதில்லை என்று சித்தராமையா திட்டவட்டமாகத் தெரிவித்துள்ளார். 1978-ஆம் ஆண்டு தாலுகா வார்டு உறுப்பினராகத் தொடங்கி, 2028-க்குள் அரை நூற்றாண்டு கால அரசியல் பயணத்தை நிறைவு செய்யவுள்ள அவர், மக்கள் உரிமைகளுக்காகத் தொடர்ந்து களத்தில் நின்று குரல் கொடுப்பேன் என உறுதியளித்துள்ளார். பதவிகளையும் தேர்தல் களத்தையும் தாண்டியும் மக்கள் தொண்டாற்ற முடியும் என்பதை உணர்த்தும் இவரது இந்த அறிவிப்பு, அவரது நீண்டகால அரசியல் அனுபவத்திற்கும் கொள்கைப் பிடிப்பிற்கும் சான்றாக அமைந்து, கர்நாடக அரசியல் வட்டாரத்தில் பெரும் நெகிழ்ச்சியையும் விவாதத்தையும் ஏற்படுத்தியுள்ளது.