வெளிநாடு சென்ற இந்தியர்களுக்கு நேர்ந்த கதி… 37,000 இந்தியர்கள் உயிரிழந்தது எப்படி?… மத்திய அரசு வெளியிட்ட பகீர் புள்ளிவிவரம்…!!!

கடந்த ஐந்து ஆண்டுகளில் வெளிநாடுகளில் வேலைக்குச் சென்ற 37,740 இந்தியத் தொழிலாளர்கள் உயிரிழந்துள்ளதாக மத்திய அரசு நாடாளுமன்றத்தில் அதிர்ச்சியூட்டும் தகவலை வெளியிட்டுள்ளது. மாநிலங்களவையில் மத்திய வெளியுறவுத்துறை இணை அமைச்சர் கீர்த்தி வர்தன் சிங் தாக்கல் செய்த அறிக்கையின்படி, 2021 முதல் 2025 வரையிலான காலகட்டத்தில் இந்த மரணங்கள் நிகழ்ந்துள்ளன.

இதில் குறிப்பாக 2021-ஆம் ஆண்டில் அதிகபட்சமாக 8,234 உயிரிழப்புகள் பதிவாகியுள்ளன. அதன் பிறகு சற்று குறைந்திருந்தாலும், கடந்த சில ஆண்டுகளாக இந்த எண்ணிக்கை தொடர்ந்து அதிகரித்து வருவது கவலைக்குரிய விஷயமாகப் பார்க்கப்படுகிறது.

இந்த உயிரிழப்புகளில் சுமார் 86 சதவீதத்திற்கும் அதிகமானவை வளைகுடா நாடுகளிலேயே நிகழ்ந்துள்ளன என்பது குறிப்பிடத்தக்கது. ஐக்கிய அரபு அமீரகம் மற்றும் சவூதி அரேபியா ஆகிய நாடுகளில் தான் அதிகப்படியான மரணங்கள் பதிவாகியுள்ளன. மரணங்கள் மட்டுமின்றி, ஊதியப் பிரச்சினைகள் மற்றும் பணிச்சூழல் தொடர்பான புகார்களும் பெருமளவில் அதிகரித்துள்ளன.

கடந்த ஐந்து ஆண்டுகளில் வெளிநாட்டுத் தூதரகங்களுக்கு இந்தியத் தொழிலாளர்களிடமிருந்து சுமார் 80,985 புகார்கள் வந்துள்ளன. மலேசியா மற்றும் மாலத்தீவு போன்ற நாடுகளிலும் தொழிலாளர் சார்ந்த சிக்கல்கள் கணிசமாக உயர்ந்துள்ளதாக மத்திய அரசின் புள்ளிவிவரங்கள் தெரிவிக்கின்றன.