நள்ளிரவில் ரயிலில் கழிப்பறைக்கு சென்றேன்… அப்போது காத்திருந்த அதிர்ச்சி… “சுற்றுலாப் பயணிகளுக்கு இதுதான் பாதுகாப்பா?” வெளிநாட்டுப்பெண் வேதனை…!!

இந்தியாவுக்குச் சுற்றுலா வந்த வெளிநாட்டுப் பெண் ஒருவர் ரயிலில் பயணம் செய்தபோது, சக பயணிகளின் அநாகரீகமான நடத்தையால் மிகுந்த மன உளைச்சலுக்கு ஆளான சம்பவம் பெரும் கவலையை ஏற்படுத்தியுள்ளது. அவர் அமர்ந்திருந்த பெட்டியில் இருந்த சில நபர்கள், அவரைத் தொடர்ந்து முறைத்துப் பார்த்துக்கொண்டே இருந்ததால், அவர் மிகுந்த அசௌகரியத்தை உணர்ந்துள்ளார். பொது இடங்களில் ஒரு பெண்ணை இப்படித் தொடர்ந்து சங்கடப்படுத்துவது அநாகரீகமானது என்று அவர் குறிப்பிட்டுள்ளார்.

சிறிது நேரத்திற்குப் பிறகு அந்தப் பெண் கழிவறைக்குச் சென்றபோது, ஒரு நபர் அவரைப் பின்தொடர்ந்து கழிவறை வரை வந்துள்ளார். அவர் வெளியே நின்று கதவைத் தள்ளிக் கொண்டு அச்சுறுத்தும் வகையில் நடந்துகொண்டதால், உள்ளே இருந்த அந்தப் பெண் கடும் அச்சமடைந்துள்ளார். நிலைமை மோசமாவதை உணர்ந்த அவர், வெளியே வந்தவுடன் அந்த நபரை எதிர்கொள்ள அஞ்சி, உடனடியாகத் தனது உடைமைகளை எடுத்துக்கொண்டு அங்கிருந்து தப்பினார்.

பயத்தின் காரணமாக அவர் தனது பெட்டியை மாற்றி வேறொரு பெட்டிக்குச் சென்று தஞ்சமடைந்தார். பின்னர் இச்சம்பவம் குறித்துப் பேசிய அவர், இதுபோன்ற சம்பவங்கள் எந்தவொரு பயணியையும் நிலைகுலையச் செய்யும் என்றும், பொது இடங்களில் அனைவரும் கண்ணியத்துடனும் மரியாதையுடனும் நடந்துகொள்வது அவசியம் என்றும் வலியுறுத்தினார். சுற்றுலாப் பயணிகளின் பாதுகாப்பு கேள்விக்குறியாவதை இச்சம்பவம் வெளிச்சமிட்டுக் காட்டியுள்ளது.